ماڭعىستاۋ وبلىسىندا وقۋشىلار ارابتىڭ «دالال» ءيىسسۋىنان ۋلاندى

استانا. قازاقپارات - ورتا مەكتەپتىڭ التى وقۋشىسى ماڭعىستاۋ وبلىسى شەتپە اۋىلىندا اۋرۋحاناعا جەتكىزىلدى، دەپ حابارلايدى قازاقپارات.

tumba.kz تىڭ وبلىستىق دەنساۋلىق ساقتاۋ باسقارماسىنا سىلتەمە جاساپ تاراتقان اقپاراتىنا سۇيەنسەك، وقۋشىلاردىڭ وزدەرىن جايسىز سەزىنۋىنە «Dalal» ءيىسسۋى سەبەپ بولعان.

مەكتەپ ۇستازىنىڭ ايتۋىنشا، التىنشى سىنىپ وقۋشىسى وزىمەن بىرگە ارابتىڭ «Dalal» مايلى ءيىسسۋىن الىپ كەلىپ، ونى كابينەتكە سەپكەن. ساباق بارىسىندا سىنىپ ىشىندە پارفيۋمنىڭ وتكىر ءيىسى سەزىلگەن. مەكتەپ مەدبيكەسىنە شاعىمدانعاننان كەيىن، جەدەل جاردەم شاقىرتىلىپ، التى وقۋشى ورتالىق اۋداندىق اۋرۋحاناعا جەتكىزىلدى. مەديتسينالىق كومەك كورسەتىلىپ، ءۇش ساعاتتىق باقىلاۋدان كەيىن، وزدەرىن جاقسى سەزىنگەن وقۋشىلار ۇيلەرىنە قايتارىلدى.

تۇتىنۋشىلار قۇقىقتارىن قورعاۋ دەپارتامەنتىنىڭ قىزمەتكەرلەرى ەپيدەميولوگيالىق تەكسەرۋ جۇرگىزدى. تالاپقا سايكەس 18 -قازان كۇنى «Dalal» ءيىسسۋى توكسيكولوگيالىق ساراپتاماعا جىبەرىلدى.