قىزىلوردادا اكەلەر فورۋمى ءوتتى - فوتو
فورۋمعا وبلىس اكىمىنىڭ ورىنباسارى، ايەلدەر ىستەرى جانە وتباسىلىق- دەموگرافيالىق ساياسات جونىندەگى كوميسسيا ءتوراعاسى رۋسلان رۇستەموۆ قاتىسىپ، وبلىستىڭ ۇلگىلى اكەلەرىن بيىلعى ەلىمىزدىڭ تاۋەلسىزدىگىنىڭ 25 جىلدىعىمەن قۇتتىقتادى.
وبلىس اۋداندارى مەن قىزىلوردا قالاسىنان ۇلگىلى اكەلەردىڭ باسىن قوسقان شارانىڭ ماقساتى - ۇلتتىق داستۇرىمىزگە قۇرمەت كورسەتە وتىرىپ، جاستاردىڭ بويىنا وتانشىلدىق، پاتريوتتىق سەزىمدەردى قالىپتاستىرۋ، اكە مەن بالا اراسىنداعى قارىم- قاتىناس تۋرالى ءتۇرلى كوزقاراستار مەن تۇجىرىمداردى ءبىر ورتاعا شوعىرلاندىرۋ، جاڭاشىل يدەيالارعا قولداۋ كورسەتۋ.
فورۋم اياسىندا وتباسى قۇندىلىقتارى مەن اكەنىڭ قوعامداعى ءرولىن ناسيحاتتايتىن بەينەروليك كورسەتىلدى.
سونىمەن قاتار، شاراعا قاتىسۋشى اكەلەر بايانداما جاساپ، وتباسى قۇندىلىقتارى، ۇلتتىق سانا، بالا تاربيەسىندەگى اكەنىڭ ءرولى تۋراسىندا وي- پىكىرلەرىن ورتاعا سالدى.
قازاق قوعامىندا قادىم زاماننان بالا تاربيەسىنە بەي-جاي قاراماعان. اكەلەرىمىز بالانى ەرتەڭگى ەل قورعايتىن ەر، ۇلتتىڭ نامىستى ازاماتى رەتىندە ادىلدىككە، قايسارلىققا، مارتتىككە تاربيەلەگەن. «بالانى جاستان» دەگەن اتالى ءسوزدىڭ استارىنان قازاقتىڭ بالا تاربيەسىنە قانشالىقتى كوڭىل بولگەنىن، اكە تاربيەسىنىڭ ماڭىزىن اڭعارۋعا بولادى.
ءاربىر وتباسىندا اتا- انا اراسىندا بەرەكە- بىرلىك بولسا، سول شاڭىراقتىڭ ءتۇتىنى دە ءتۇزۋ شىعىپ، ۇلكەنگە قۇرمەت، كىشىگە ىزەت كورسەتە بىلەتىن، پاراساتى مەن پايىمى جاراسقان سانالى ۇرپاق تاربيەلەنەرى ءسوزسىز.
فورۋم اياسىندا قوعامداعى ءبىرقاتار كەلەلى ويلار ورتاعا سالىنىپ، ۇلگىلى اكەلەر ءوزارا تاجىريبە الماستى.
شارا سوڭىندا قاتىسۋشىلار وبلىس اكىمىنىڭ ارنايى العىسىمەن جانە باعالى سىيلىقتارمەن ماراپاتتالدى. سونىمەن قاتار، وبلىس اتىنان 4 ۇلگىلى اكە استانا قالاسىندا وتەتىن رەسپۋبليكالىق اكەلەر فورۋمىنا قاتىسادى.
ايتا كەتەيىك، مۇنداي وسكەلەڭ ۇرپاق ءۇشىن تاعىلىمدىق- تاربيەلىك ءمانى زور شارانىڭ وتۋىنە وبلىس اكىمى جانىنداعى ايەلدەر ىستەرى جانە وتباسىلىق- دەموگرافيالىق ساياسات جونىندەگى كوميسسيا، وبلىستىق ىشكى ساياسات باسقارماسى مەن «مەديا- پرەسس» قوعامدىق قورى ۇيىتقى بولدى.
اۆتور: ەلۋباي اۋەزوۆ
