قازاقستاننىڭ بارلىق اۋدان ورتالىقتارىندا ينتەرنەتكە قولجەتىمدىلىك قامتاماسىز ەتىلمەك
بۇل تۋرالى بۇگىن ق ر اقپارات جانە كوممۋنيكاتسيالار مينيسترلىگىنىڭ القا وتىرىسىندا ۆەدومستۆو باسشىسى داۋرەن ابايەۆ ايتتى، دەپ حابارلايدى قازاقپارات.
«تەلەكوممۋنيكاتسيانى دامىتۋداعى باسىم مىندەتتەردىڭ ءبىرى حالىقتىڭ ينتەرنەتكە كەڭجولاقتى قولجەتىمدىلىكپەن قامتاماسىز ەتۋ. بۇگىندە پايدالانۋشىلار سانى 73 پايىزعا جەتىپ وتىر. بۇل قازاقستاننىڭ باسەكەگە قابىلەتتىلىكتىڭ جاھاندىق رەيتينگى يندەكسىندە 41-ورىنعا تۇراقتاۋىنا مۇمكىندىك بەردى. تۇرعىندار سانى 10 مىڭ جانە ودان دا كوپ اۋىلدىق ەلدى مەكەندەردە 3G ستاندارتىنىڭ موبيلدى بايلانىسى ەنگىزىلدى. 4G ستاندارتى تۇرعىندار سانى 50 مىڭنان اساتىن اۋىلدىق ەلدى مەكەندەردە قوسىلدى. 2017 -جىلدىڭ سوڭىنا قاراي ەلىمىزدىڭ بارلىق اۋدان ورتالىقتارى 4G ستاندارتىمەن قامتىلاتىن بولادى»، - دەدى ول.
سونىمەن بىرگە ابايەۆ، مينيسترلىك «قازاقتەلەكوم» جانە «ترانستەلەكوم» كومپانيالارىمەن بىرلەسىپ، اۋىلدىق ەلدى مەكەندەردى ينتەرنەت جەلىسىنە كەڭجولاقتى قولجەتىمدىلىكپەن قامتاماسىز ەتۋ جوباسىن ازىرلەگەندىگىن ايتتى.
«اتالعان جوبانى جۇزەگە اسىرۋدىڭ ناتيجەسىندە 1300 اۋىلدىق ەلدى مەكەندە جاڭا بۋىنداعى بايلانىس ينفراقۇرىلىمى قۇرىلاتىن بولادى. ول اۋىل مەكتەپتەرىنىڭ، اۋرۋحانالاردىڭ، پوشتالاردىڭ، ءتۇرلى مەملەكەتتىك ۇيىمدار مەن بيۋدجەتتىك مەكەمەلەردىڭ جوعارى جىلدامدىقتى ينتەرنەتكە قوسىلۋىن قامتاماسىز ەتەدى»، - دەدى مينيستر.
ونىڭ دەرەكتەرىنە قاراعاندا، «OTAU TV» سپۋتنيكتىك حابار تاراتۋ جەلىسى ەلىمىزدىڭ اۋماعىن 100 پايىز قامتىعان. 1 -قازانداعى مالىمەتتەرگە سايكەس، ابونەنتتەر سانى 1,2 ميلليون ادامدى قۇراعان. وسى رەتتە ابايەۆ اتالعان باعىت بويىنشا جوبانى ىسكە اسىرۋ جونىندەگى جول كارتاسىن بەكىتۋ، «OTAU TV» باسەكەگە قابىلەتتىلىگى مەن كورسەتىلىمىن ارتتىرۋ جونىندە ۇسىنىستار ەنگىزۋدى تاپسىردى.
اۆتور: مارلان جيەمباي
