ءبىلىم مينيسترلىگى مەكتەپكە حيدجابپەن كەلەتىن وقۋشىلارعا قاتىستى رەسمي ۇستانىمىن ءبىلدىردى

استانا. قازاقپارات - ق ر ءبىلىم جانە عىلىم ۆيتسە- ءمينيسترى ەلميرا سۋحانبەرديەۆا ۇكىمەتتىڭ ءبىلىم بەرۋ مەكەمەلەرىنە ءدىني كيىم كيۋگە قاتىستى رەسمي ۇستانىمىن جاريا ەتتى، دەپ حابارلايدى قازاقپارات.

«بۇگىنگى تاڭدا ب ع م- گە وسى سۇراققا بايلانىستى 5 مىڭنان استام ءوتىنىش كەلگەن. سوندىقتان بۇعان قاتىستى ناقتى ۇستانىمدارىمىزدى ايتۋدى ۇيعاردىق. مەكتەپ جارعىسىندا كورسەتىلگەن تارتىپكە قاراماستان، بالالارىن مەكتەپكە ءدىني كيىممەن اكەلەتىن اتا- انالارمەن ءبىر ەمەس، كوپ مارتە تۇسىنبەۋشىلىكتەر ورىن الىپ كەلگەنىن بىلەسىزدەر. اتا- انالار بىزگە ناقتى ۇستانىمدارىمىزدى جاريالاۋدى سۇراعاندىقتان، ءبىز وڭ كوزقاراس بولاتىنىنا ۇمىتتەنەمىز»، - دەدى ول ورتالىق كوممۋنيكاتسيالار قىزمەتىندە وتكەن بريفينگتە.

ۆيتسە- ءمينيستردىڭ ايتۋىنشا، رەسپۋبليكا مەكتەپتەرىنىڭ جارعىلارىندا بارلىعى ناقتى كورسەتىلگەن.

«ەگەر وقۋشى ءدىني كيىممەن كەلەتىن بولسا، اتا- اناعا ەسكەرتۋ جاسالادى. بالانى ءبىز قۋمايمىز، ءدىني اتريبۋتيكانى شەشۋ ءۇشىن اتا- انالارىن شاقىرتامىز، وقۋشى ارى قاراي ساباعىنا قاتىسا بەرەدى. ەگەر ەكىنشى، ءۇشىنشى رەت قايتالانا بەرەتىن بولسا، بالانى مەكتەپكە كىرگىزىپ، اتا- اناسىن كۇتەدى. تاعى ءبىر رەت ەسكەرتەمىز، وقۋشى مەكتەپكە كىردى مە، ءدىني اتريبۋتيكاسىن شەشۋى ءتيىس. مەكتەپتەن شىعىسىمەن قايتا كيسە دە بولادى. مۇندا ەشكىمگە دە مورالدىق زارداپ تيگىزبەيمىز دەپ ويلايمىن» - دەدى ە. سۋحانبەرديەۆا.

ءوز كەزەگىندە ق ر ادىلەت ۆيتسە- ءمينيسترى زاۋرەش بايمولدينا بۇل تىيىم بۇرىننان بارىن ەسكە سالدى.

«قوسا كەتكىم كەلەدى، بۇل جاڭا تىيىم ەمەس. بۇل تالاپ بۇرىننان بار. بۇل تالاپ بىلمەستىكتەن ورىندالماي كەلدى. مەكتەپ فورماسىنىڭ ەنگىزىلۋىمەن بۇل سۇراق وزەكتى بولىپ كەتكەنى راس. اتالعان تالاپ بىزدە بۇرىننان كەلە جاتىر»، - دەدى ول.

ق ر ءدىن ىستەرى جانە ازاماتتىق قوعام مينيسترلىگى ءدىن ىستەرى كوميتەتىنىڭ ءتوراعاسى عالىم شويكين مۇندا ازاماتتارعا ءتۇسىندىرۋ جۇمىستارىن جۇرگىزۋ وتە ماڭىزدى دەپ وتىر.

 «اتا- انالارمەن اڭگىمەلەسكەن ءجون دەپ سانايمىن. ءبىرىنشى كەزەكتە ءدىني كيىم كيەتىن اتا- انالارعا تۇسىندىرگەن ابزال. مەملەكەتتىك ورگاندار بۇل جۇمىستى ءدىني ۇيىمدارمەن بىرگە اتقارىپ كەلەدى، ناتيجەلەرى دە بار. مىسال كەلتىرە كەتسەم، اتىراۋدى الاتىن بولساق، 2015 -جىلى مەكتەپكە وقۋشى حيدجابپەن كەلگەن 315 وقيعا تىركەلگەن. مەملەكەتتىك ورگاندار مەن ءدىني ۇيىمداردىڭ بىرلەسكەن جۇمىسىنىڭ ارقاسىندا ەندى تەك 113 بالا قالدى. دەگەنمەن جۇمىس ءالى اياقتالعان جوق»، - دەدى ع. شويكين.

اۆتور: جاسۇلان جولدىبايەۆ