عارىشتىق تەحنولوگيا ارقىلى ورماننىڭ زاڭسىز كەسىلۋىن انىقتاۋعا بولادى
قۇقىق قورعاۋ ورگاندارى دا ونداي زاڭ بۇزۋشىلىقتاردى تىركەۋگە اسىقپايدى. وسى سالانىڭ مامانى سەرىك تۇرىمبايەۆ ورمان قورىن KazSat-3 ارقىلى باقىلاۋدى ۇسىنىپ وتىر، دەپ حابارلايدى قازاقپارات ءتىلشىسى.
«مالايزيادا ورمان قورىن باقىلاۋ سالاسىندا عارىشتىق تەحنولوگيا كەڭىنەن قولدانىلادى. ولاردا 26 كۇن سايىن سپۋتنيك ءوتىپ وتىرادى. سوندا ءۇش اعاش ءوسىپ تۇرسا، سونىڭ بىرەۋىن كەسىپ السا، 26 كۇننەن كەيىن ءبارىن كورىپ وتىرادى. سەبەبى قازىرگى عارىشتىق تەحنيكانىڭ مۇمكىندىگى سول، جارتى مەتر جەردەگى نارسەنى ءتۇسىرىپ، كورسەتە الادى. مىنە، وسى ىسپەتتى تاجىريبەنى بىزگە دە قولدانۋعا بولادى. قازىر بىزدەKazSat-3 اپپاراتى ۇشىپ ءجۇر. وندا سۋرەتكە تۇسىرەتىن قۇرىلعىلار بار. سونى پايدالانۋ قاجەت. قازىر ورماندى ارالاپ، ءاربىر ءتۇپ اعاشتى ساناۋ سياقتى ەسكى جۇيەدەن ارىلىپ، جاڭا تەحنولوگيالاردىڭ مۇمكىندىكتەرىن كەڭىنەن پايدالانۋىمىز قاجەت. ءيا، ءبىرشاما شىعىندار بولادى. دەگەنمەن، ەلىمىزدىڭ ورمان قورىنا كەلەتىن زياننىڭ كولەمىمەن سالىستىرعاندا، ول شىعىن كوپ ەمەس»، - ا ش م جانىنداعى قوعامدىق كەڭەستىڭ مۇشەسى سەرىك تۇرىمبايەۆ.
ونىڭ ايتۋىنشا، وسىدان بىرنەشە جىل بۇرىن اۋىلشارۋاشىلىعى مينيسترلىگى زاڭسىز اعاش كەسۋ بويىنشا 1,3 ميلليارد تەڭگەنىڭ زاڭبۇزۋشىلىقتارىن انىقتاعان بولاتىن. سول كەزدە 800 ميلليارد تەڭگەنىڭ شىعىنى دالەلدەندى. الايدا ءىستىڭ ارتى سيىرقۇيىمشاقتانىپ كەتتى. سوندىقتان بۇگىندە ورمان شارۋاشىلىعى سالاسىنداعى زاڭ بۇزۋشىلىقتاردى انىقتاعانشا ونداي ارەكەتتەردىڭ الدىن الۋىنا باسا نازار اۋدارعان ءجون.
ايتا كەتەيىك، بۇگىندە اۋىل شارۋاشىلىعى مينيسترلىگى مايقاراعاي اعاشتارى وسەتىن ايماقتاردا سانيتارلىق كەسۋگە ۋاقىتشا تىيىم سالۋدى ۇسىنىپ وتىر. سەبەبى ەلىمىزدىڭ ورماندى جەرلەرىنە يەلىك ەتىپ وتىرعاندار جانە وسى ساناتتاعى جەرلەردى جالعا العاندار سانيتارلىق اعاش كەسۋدى پايدا تابۋدىڭ كوزىنە اينالدىردى. ولار قۋراعان، شىرىگەن جانە اۋرۋ اعاشتاردى كەسىپ، سانيتارلىق شارالاردى وتكىزۋدىڭ ورنىنا ساپ- ساۋ اعاشتاردى جاپىرىپ جاتادى. سونىڭ سالدارىنان قازاقتىڭ مىڭداعان تەكشە مەترلىك ورمانى قاڭىراعان قۋ دالاعا اينالىپ بارادى.
ارمان اسقاروۆ
