اتىراۋ ءوڭىرىن سۋمەن قامتىپ وتىرعان جايىق تايىزداپ كەلە جاتىر - نوعايەۆ

 استانا. قازاقپارات - اتىراۋ وبلىسىن سۋمەن قامتىپ وتىرعان جايىق جانە قيعاش وزەندەرى تايىزداپ كەلە جاتىر. بۇل تۋرالى بۇگىن سەلەكتورلىق رەجيمدە وتكەن ۇكىمەت وتىرىسىندا اتىراۋ وبلىسىنىڭ اكىمى نۇرلان نوعايەۆ ءمالىم ەتتى.

اكىمنىڭ ايتۋىنشا، قازىرگى تاڭدا اتىراۋ وبلىسىنىڭ 162 ەلدى مەكەنىنىڭ 125- ءى ورتالىقتاندىرىلعان سۋدى پايدالانىپ وتىر. بيىل تاعى 11 ەلدى مەكەندى ىسكە قوسقاندا، جىلدىڭ اياعىنا دەيىن ەلدى مەكەندەردىڭ 77,5 پايىزى ورتالىقتاندىرىلعان سۋمەن قامتاماسىز ەتىلەدى.

«اتىراۋ وبلىسىندا اۋىز سۋ نەگىزىنەن قيعاش جانە جايىق وزەندەرىنەن الىنادى جانە كوپ ەلدى مەكەندەر استراحان- ماڭعىشلاق سۋ قۇبىرى ارقىلى سۋمەن قامتاماسىز ەتىلەدى. ءبىزدىڭ ءسىزدىڭ نازارىڭىزعا قويىپ وتىرعان ماسەلەمىز جانە وسى وتىرىستىڭ حاتتاماسىنا ەنگىزۋىڭىزدى سۇرايمىز. جايىق جانە قيعاش وزەندەرى تايىزداپ كەلە جاتىر. جازعى مەزگىلدەردە وسى سۋ قۇبىرىنان سۋ تۇتىنىپ وتىرعان اتىراۋ وبلىسىنىڭ ەلدى مەكەندەرىنە سۋ جەتپەيدى. سۋ پروبلەماسى بار»، - دەدى وبلىس باسشىسى.

بۇل ماسەلەنى شەشۋ ماقساتىندا ن. نوعايەۆ اقتوبە وبلىسىنداعى كوكجيدە جەراستى سۋ قورىنان قۇبىر تارتۋدى ۇسىندى.

«اقتوبە وبلىسىندا مۇعالجار اۋدانىندا كوكجيدە جەراستى سۋ قورى بار. كەزىندە 80-جىلدارى بۇل قور زەرتتەلگەن. تاۋلىگىنە 200 مىڭ تەكشە مەترگە دەيىن سۋ شىعاراتىن مۇمكىنشىلىگى بار. مامانداردىڭ ايتۋى بويىنشا، بۇل تولىعىمەن زەرتتەلمەگەن. ونىڭ تاۋلىگىنە 500-600 مىڭ تەكشە مەتر سۋ بەرەتىن مۇمكىنشىلىگى بار. ەگەر وسى سۋ قورى جۇمىس جاساپ تۇراتىن بولسا، وندا وسى جەراستى   سۋ قورى وتە پايدالى. سەبەبى فيلتراتسيالىق قاسيەتتەرى جۇمىس جاساپ تۇرعان كەن ورنىندا سۋ ساپاسى جاقسارادى. وسىنى ەسكەرە وتىرىپ، كوكجيدەدەن قۇلسارى قالاسىنا دەيىن سۋ قۇبىرىن جۇرگىزۋ بويىنشا مەملەكەتتىك ورگاندارعا تاپسىرما بەرۋىڭىزدى سۇرايمىز. اراقاشىقتىعى  300  شاقىرىم. بۇل بۇگىن- ەرتەڭ شەشىلەتىن ماسەلە ەمەس. قازىرگى تاڭدا ءسىزدىڭ الدىڭىزعا قويىپ وتىرعانىمىز، وسى سۋ قورىن كەڭىنەن زەرتتەپ، مۇمكىنشىلىكتەرىن پايدالانىپ، ال سۋ قۇبىرىن سالۋ ماسەلەسىن مەملەكەتتىك- جەكەمەنشىك سەرىكتەستىك پرينتسيپىمەن سالۋ ماسەلەسىن ءتيىستى   مەملەكەتتىك ورگاندارعا تاپسىرۋىڭىزدى سۇرايمىز. سەبەبى اتىراۋ وبلىسىندا سۋمەن قامتۋ ماسەلەسى جىلدان جىلعا شيەلەنىسىپ بارادى»، - دەپ ءتۇيدى ءسوزىن اتىراۋ وبلىسىنىڭ اكىمى.   

اۆتور:   جاسۇلان جولدىبايەۆ