قىلمىسكەر وزگەنىڭ ساۋساق ءىزىن، ونىڭ قولىن كەسىپ العاندا عانا پايدالانا الادى

استانا. قازاقپارات - الداعى جىلدارى جەكە كۋالىكتىڭ ارتقى جاعىنداعى ەلەكتروندى چيپكە قازاقستان ازاماتىنىڭ داكتيلوسكوپتىق مالىمەتتەرى، ياعني ساۋساق ىزدەرى دە ەنگىزىلەدى.

اتالعان جۇمىستى كەزەڭ- كەزەڭىمەن جۇرگىزۋ كوزدەلگەن. ءسويتىپ، بىرنەشە جىلدان كەيىن بارلىق كۋالىكتەردى تولىعىمەن ايىرباستاۋ جوسپارلانىپ وتىر، دەپ حابارلايدى قازاقپارات ءتىلشىسى.

ق ر ىشكى ىستەر مينيسترلىگى كوشى- قون پوليتسياسى دەپارتامەنتىنىڭ باستىعى سەرىك سايىنوۆ بۇگىن ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا اتاپ وتكەندەي، وسى ۋاقىتقا دەيىن جەكە كۋالىك العان ازاماتتارعا قۇجات مەرزىمى اياقتالعانشا جۇرە بەرۋىنە بولادى. ال 2021 -جىلدان باستاپ بارلىق كۋالىكتەردىڭ چيپتارىنا داكتيلوسكوپتىق مالىمەتتەر ەنگىزىلەدى.

«ءبارى ادەتتەگىدەي جۇرگىزىلەدى. جەكە كۋالىك الاتىن ادام حالىققا قىزمەت كورسەتۋ ورتالىعىنا بارىپ، تاپسىرىس بەرەدى. ءبىراق بۇرىنعى پروتسەدۋرالارمەن بىرگە ول سەنسورلىق قۇرىلعىلارعا ساۋساعىن باسىپ، داكتيلوسكوپتىق مالىمەتتەردى قالدىراتىن بولادى. بۇدان بولەك، قازاقستانعا كەلەتىن شەتەل ازاماتتارى دا ۆيزا العاندا وسى ىسپەتتى دەرەكتەردى تاپسىرادى»، - دەدى س. ساينوۆ.

ونىڭ ايتۋىنشا، بۇگىندە وسى سالاداعى زاڭناماعا وزگەرىستەرمەن تولىقتىرۋلار ەنگىزۋ ماسەلەسى جان- جاقتى تالقىلاندى. جاقىن ارادا ءتيىستى زاڭ جوباسىن ۇكىمەتتىڭ قاراۋىنا ەنگىزۋ كوزدەلىپ وتىر. جالپى، داكتيلوسكوپتىق جانە گەنومدىق تىركەۋ شارالارىنا ەل بيۋدجەتىنەن 24 ميلليارد تەڭگە بولىنبەكشى.

«نەگىزى، بۇگىندە ونداي جۇيەنى دامىعان مەملەكەتتەردىڭ باسىم بولىگى كەڭىنەن قولدانىپ كەلەدى. ونىڭ ءبىر ارتىقشىلىعى، ادامنىڭ كۋالىگى بولماسا دا، ساۋساقتىڭ ىزىمەن بانكتەردىڭ سونداي- اق، مەملەكەتتىك ورگانداردىڭ قىزمەتىن الۋعا بولادى»، - دەيدى ول.

وسى ورايدا، جۋرناليستەردىڭ ءبىرى قويعان: «ال قىلمىسكەرلەر ادامنىڭ ساۋساق ءىزىن قولدانىپ، نەسيە الىپ جۇرمەي مە؟»، - دەگەن سۇراققا: «ءسىز شەتەلدىك فيلمدەردى كوپ كورگەن شىعارسىز. بىزدە ساۋساق ىزدەرىنىڭ ەلەكتروندى نۇسقاسى ساقتالادى. ەندى، وسى ۋاقىتقا دەيىن داكتوكارتانى پايدالانىپ، قىلمىس جاسادى دەگەندى ەستىگەن ەمەسپىن. ءاربىر ادامنىڭ ساۋساق ىزدەرى وزگەشە بولىپ كەلەدى. ونىڭ 6-دان 200-گە دەيىن وزىندىك ەرەكشەلىكتەرى بار. سوندىقتان ونى بانك وپەراتسيالارىن جاساۋ ءۇشىن پايدالانۋ مۇمكىن ەمەس. بۇل جەردە ساۋساقتىڭ ءوزى كەرەك. فيلمدەردە كورگەن شىعارسىز، بانككە ءوتۋ ءۇشىن ادامنىڭ قولىن كەسىپ الادى عوي (كۇلدى)»، - دەپ جاۋاپ بەردى دەپارتامەنت باستىعى.

ارمان اسقاروۆ