17:20, 18 - قازان 2016 | GMT +5
قىتايداعى ەلشى ارىپتەسىمەن كوڭىل جاراستىرعانى ءۇشىن جۇمىسىنان شەتتەتىلدى
استانا. قازاقپارت - نيدەرلاندىنىڭ قىتايداعى ەلشىسى رون كەللەر قىتايلىق ارىپتەس كەلىنشەكپەن كوڭىل جاراستىرعانى ءۇشىن جۇمىسىنان ۋاقىتشا شەتتەتىلدى.
قازىر ولاردىڭ بايلانىسى تەكسەرىلۋدە. ديپلوماتتىڭ جۇمىسىنان ۋاقىتشا شەتتەتىلگەنى تۋرالى نيدەرلاندىنىڭ سىرتقى ىستەر مينيسترلىگى حابارلاعان.
ەلشىنىڭ ارىپتەسىمەن بايلانىسى جاقىندا عانا بەلگىلى بولعان. بۇل ەلشىلىك جۇمىسىنىڭ ەرەجەلەرىنە قايشى. ديپلوماتتاردىڭ وزدەرى جۇمىس ىستەيتىن ەلدىڭ ازاماتتارىمەن جۇمىستان تىس جاقىن قارىم- قاتىناستا بولۋى قۇپتالمايتىن ءىس. سەبەبى ءتۇرلى قاۋىپ بار. مىسال ءۇشىن، ديپلوماتتىڭ كوڭىل قوسقان ادامى جەرگىلىكتى بارلاۋ قىزمەتىنىڭ اگەنتى بولۋى مۇمكىن.
رون كەللەر بۇل لاۋازىمعا 2015 -جىلدىڭ جەلتوقسانىندا تاعايىندالعان. بۇعان دەيىن ول تۇركيا مەن رەسەيدە ەلشىلىك قىزمەت اتقارعان.
دەرەككوز: korrespondent.net
