الدار كوسەنىڭ ايگىلى بورىگى قايدا؟
ءىس ساپار بارىسىندا بۇقار جىراۋ اتىنداعى ادەبيەت جانە ونەر مۋزەيىنىڭ قورىندا ساقتالعان ەرەكشە دارىن يەسى، تالانتتى رەجيسسەر، اكتەر شاكەن ايمانوۆتىڭ «الدار- كوسە» ، «نايزاتاس باۋرايىندا» فيلمدەرىندە كيگەن بورىگى نازار اۋدارتپاي قويمادى.
الداردىڭ بورىگى مۋزەي قورىنا قالاي تاپ بولدى؟
شاكەن ايمانوۆتىڭ بورىگى مۋزەي قىزمەتكەرلەرىنىڭ قولىنا قالاي تۇسكەنىن بۇقار جىراۋ اتىنداعى مۋزەي ديرەكتورىنىڭ ورىنباسارى ماعزيا قايىربەك قىزى اڭگىمەلەپ بەردى.
- 1969 -جىلى تۇسىرىلگەن «نايزاتاس باۋرايىندا» فيلمىنىڭ ءبىراز سيۋجەتتەرى باياناۋىل وڭىرىندە تۇسىرىلگەن دەسەدى. الماتىدا فيلمنىڭ ءتۇسىرىلىمى اياقتالعاننان كەيىن شاكەن ايمانوۆ قوسىمشا تۇسىرىلىمدەر جاساۋ ءۇشىن باياناۋىل باۋرايىنا قايتا كەلگەن ەكەن. كەرى قايتىپ بارا جاتقاندا جولاي پاۆلودار قالاسىنا توقتاپ، نەمەرە اعاسى ورال مۇزاپاروۆتىڭ ۇيىنە قونادى. سوندا رەجيسسەر: «ارتىستەردىڭ قالتاسىندا قايبىر ءجوندى اقشا بولسىن؟ «قۋىس ۇيگە قۇر بارما» دەمەكشى بىرنەشە فيلمدەرگە تۇسكەن ايگىلى بورىگىمدى تاستاپ كەتەيىن» ، - دەپ ءۇي يەلەرىنە قالدىرعان ەكەن. مۇزاپاروۆتار اۋلەتى شاكەن اعامىزعا ءۇش اتادان قوسىلاتىن نەمەرە اعا بولسا كەرەك. ول كىسىلەر كونە جادىگەردى كوزىنىڭ قاراشىعىنداي ساقتاپ، ۇيىندە ءبىراز جىل ۇستاعان. 1970 -جىلى شاكەن اعامىز قايتىس بولدى. اعاسى بورىكتى ۇيدە ساقتاعاننان گورى مۋزەيدە تۇرسىن دەگەن نيەتپەن «بۇل تاريحي جادىگەر بولعاندىقتان حالىققا ورتاق ەستەلىك، جۇرت كورسىن- ءبىلسىن» دەپ، بىزگە اكەلىپ تاپسىردى. بۇل - ورال مۇزاپاروۆ اعامىزدىڭ تاراپىنان ادامگەرشىلىكتىڭ، تاريحقا دەگەن، شاكەن اعامىزعا دەگەن قۇرمەتىنىڭ بەلگىسى دەپ ويلايمىن.
ماعزيا قايىربەك قىزىنىڭ ايتۋىنشا مۋزەي قىزمەتكەرلەرى 2004 -جىلى قازاق كينو ونەرىنىڭ جۇلدىزى شاكەن ايمانوۆتىڭ 90 جىلدىعىنا بايلانىستى پاۆلودارداعى شاكەن ايمانوۆ اتىنداعى كينوتەاتردا كورمە وتكىزگەن. سول كورمەگە شاكەن بابامىزدىڭ تۋىستارى، زامانداستارى جينالىپتى. سول جيىندا ورال مۇزاپاروۆ اعامىز كوزى تىرسىندە شاكەننىڭ تەرى مەن ەڭبەگى سىڭگەن قۇندى زاتى - بورىگىن مۋزەي قورىنا سىيعا تارتىپتى.
«الدار- كوسە» فيلمى - شاكەن ايمانوۆتىڭ كينو ونەرىندەگى الدار- كوسە ءرولىن سومداعان ءىرى شىعارماسى. ەكراندا حالىقتىڭ سۇيىكتى كەيىپكەرى ءوزىنىڭ اقىلدىلىعىمەن، تاپقىرلىعىمەن، كەڭ پەيىلدىلىگىمەن، ۇشقىر ويىمەن، دانالىعىمەن تانىلادى جانە وسىنىڭ ءبارى ءازىل- قالجىڭىمەن جەتكىزىلەدى. الدار- كوسە رولىندەگى شاكەن ايمانوۆتىڭ شەبەرلىگى حالىق ەرتەگىسىن قازىرگى كەزبەن بايلانىستىرىپ، ءارى الداردىڭ كوزقاراسىن، ءتالىم- تاربيەسىن بۇگىنگى كۇننىڭ تۇسىنىگىمەن جەتكىزە ءبىلۋى. اكتەردىڭ وتە شىنايى ويىنى ەكراننان الداردىڭ ءوزىن كورگەندەي اسەر قالدىرادى.
ماعزيا قايىربەك قىزى بۇل جادىگەر - بۇقار جىراۋ اتىنداعى ادەبيەت جانە ونەر مۋزەيى ءۇشىن وتە قۇندى جادىگەر ەكەنىن ايتادى.
El.kz
