استانالىق ايەل سوت ارقىلى ايفون كوشىرمەسىنىڭ قۇنىن ءوندىرىپ الدى

استانا. قازاقپارات - «اپەلسين-2015» ج ش س ينتەرنەت-دۇكەنى ارقىلى iPhone 5c  سمارتفونىنىڭ كوشىرمەسىن ساتىپ العان ايەل، ونداعى اقاۋلاردى بايقاپ، تەلەفون اقشاسىن قايتارىپ الۋدى شەشكەن، دەپ حابارلايدى قازاقپارات.

ول ۇيالى تەلەفون ءۇشىن تولەمدى جاۋاپكەردىڭ شوتىنا «پوشتالىق اقشا اۋدارىمى» جەلىسى ارقىلى جىبەرگەن.

«ۇيالى تەلەفوننان اقاۋ تاپقاننان كەيىن، ونى قايتا جونەلتىپ، ساتۋشىدان اقشاسىن قايتارۋدى تالاپ ەتكەن. جاۋاپكەر ءوز كەزەگىندە ساتىپ الۋشى تالابىنا ءمان بەرمەگەن. «تۇتىنۋشىلاردىڭ قۇقىقتارىن قورعاۋ تۋرالى» قازاقستان رەسپۋبليكاسىنىڭ زاڭىنا سايكەس، تۇتىنۋشىلار ءتيىستى نەمەسە ءتيىسسىز ساپاداعى تاۋاردى قايتارۋ نەمەسە ايىرباستاۋ قۇقىعىنا يە»، - دەپ حابارلادى استانا سوتىنىڭ باسپا ءسوز قىزمەتىنەن.

استانا قالاسىنىڭ سارى ارقا اۋداندىق سوتى جاۋاپكەردەن تەلەفون قۇنىن ءوندىرۋ تۋرالى تالاپ-ارىزدى قاناعاتتاندىردى.

سوت شەشىمى زاڭدى كۇشىنە ەندى.