قىزدارعا كەڭەس! كۇيەۋدىڭ بابىن قالاي تابادى؟

استانا. قازاقپارات - يسلامعا دەيىنگى كەزەڭدە ءومىر سۇرگەن ۋماما دەگەن اقىلدى ايەل قىزى ۋناستى كيندا پاتشاسى حاريسپەن ۇيلەندىرگەندە ءالى كۇنگە قۇنى ەسكىرە قويماعان مىنانداي وسيەت ايتقان ەكەن.

قىزىم، ەگەر ءبىر قىز اتا-اناسىنىڭ بايلىعى جەتكىلىكتى بولىپ، كۇيەۋگە شىعۋدى قاجەتسىنبەيتىن بولسا، وندا بارىنەن بۇرىن وعان سەن لايىق بولار ەدىڭ. الايدا ءومىر زاڭى باسقاشا. ەر ادام قالايشا ءبىز ءۇشىن جاراتىلعان بولسا، ايەل دە و باستا ەر ادام ءۇشىن جاراتىلعان. قىزىم سەن ءوزىڭدى تۋىپ، ايالاپ وسىرگەن اكە- شەشەڭنىڭ ۇياسىنان ۇشىپ جات جۇرتقا كەتىپ بارا جاتىرسىڭ. ەندىگى ۋاقىتتا سەن كۇيەۋىڭە باعىنىپ ونىڭ ريزاشىلىعىن الىپ وتىرعايسىڭ. سوندا ول دا سەنىڭ الدىڭدا قۇلىڭداي قۇراق ۇشاتىن بولادى. سەن ونى سىيلاعان سايىن ول دا سەنى جاقسى كورىپ، قالاعانىڭدى ىستەيتىن بولادى. مەن ساعان قازىر 10 وسيەت ايتايىن. ەگەر سەن ولاردى بۇلجىتپاي ورىندايتىن بولساڭ، كۇيەۋىڭمەن ارا- قاتىناسىڭدا ءمىن بولمايدى.

ۇيگە ءىشىپ- جەيتىن نە اكەلسە دە شىن جۇرەكپەن قابىل ال. قاناعات يەسى بول.

نە ىستە دەسە، سونى ىستە. تىيىم سالعان نارسەلەرىنە جولاما.

ءۇي ءىشىن دە، ءۇستى باسىڭدى دا تازا ۇستا.

كۇيەۋىڭە جاقسى كورىنۋگە تىرىس. جاقسى يىستەرىڭنەن سەبىنە ءجۇر. ول سەنەن تىجىرىنبايتىن بولسىن.

ۇيىقتايتىن، تاماقتاناتىن كەزدەرىن جاقسى ءبىل. ول بۇلاردى قاي ۋاقىتتاردا جاسايتىن بولسا، سەن سول ۋاقىتتاردا تاماعىن ازىرلەپ، توسەگىن سالىپ قوي. ويتكەنى اشتىق پەن ۇيقىسىزدىقتان بارىپ، ادام اشۋ شاقىرعىش كەلەدى.

كۇيەۋىڭنىڭ دۇنيەسىن كوزىڭنىڭ قاراشىعىنداي ساقتا.

ىسىراپشىلدىققا جول بەرمە.

ونىڭ ابىرويىن ويلا. تۋما- تۋىسقاندارىنا دا قۇرمەتپەن قارا.

وعان قارسى شىعۋشى بولما. كۇيەۋىڭنىڭ سىرىن ەلگە جايما. قارسى شىقساڭ ساعان دەگەن وشپەندىلىگى ويانادى. ال سىرىن ەلگە جايساڭ قياناتتان كوز اشپايتىن بولاسىڭ.

كۇيەۋىڭ قايعىرىپ وتىرعاندا، سەن قۋانىشتى بولما. كۇيەۋىڭ قۋانىشتى كەزدە سەن قايعىرما!