تەمەكى جانە الكوگولگە قوسىمشا سالىق وسەتىن بولدى
بۇل تۋرالى بۇگىن ق ر پارلامەنتى ءماجىلىسىنىڭ وتىرىسىندا ق ر ۇلتتىق ەكونوميكا ءمينيسترى قۋاندىق بيشىمبايەۆ ءمالىم ەتتى، دەپ حابارلايدى قازاقپارات.
مينيسترلىكتىڭ مالىمەتىنە قاراعاندا، بۇل ماسەلە 2017-2019 -جىلدارعا الكوگولدىك ونىمگە، سىرا، تەمەكىگە اكسيزدەر مولشەرلەمەسىن بەكىتۋدە ەسكەرىلگەن.
«الكوگول جانە تەمەكى ونىمدەرىنە اكسيزدەردىڭ فيسكالدىق فۋنكسياسىن كۇشەيتۋ ءۇشىن ونىڭ مولشەرلەمەسىن ساتىلاپ ۇلعايتۋ ۇسىنىلادى. قازىرگى قولدانىستاعى سالىق كودەكسىندە اكسيزدىك سالىق مولشەرلەمەلەرىنىڭ ولشەمى 2014-2016 -جىلدارعا عانا بەلگىلەنگەن، ال 2017-2019 -جىلدارعا بەلگىلەنبەگەن. الكوگولدىك ءونىمنىڭ 1 ليترى ءۇشىن: 2017 -جىلى - 2000 تەڭگە، 2019 -جىلى - 2550 تەڭگەگە دەيىنگى اكتسيزدىك مولشەرلەمەنى بەلگىلەۋ ۇسىنىلىپ وتىر. 2016 -جىلمەن سالىستىرعاندا، ءوسىم - 85 پايىزدى قۇرايدى. ال، سىرا جانە سىرا سۋسىندارىنىڭ 1 ليترى ءۇشىن 2017 -جىلى 39 تەڭگە، 2019 -جىلى 57 تەڭگەگە دەيىن ءوسىرۋ ۇسىنىلادى. 2016 -جىلمەن سالىستىرعاندا ءوسىم 219 پايىزدى قۇرايدى»، - دەدى ق. بيشىمبايەۆ.
وسىلايشا، تەمەكى ونىمدەرىنىڭ 1000 داناسى ءۇشىن اكسيز 2017 -جىلى 6200 تەڭگە بولسا، 2019 -جىلى 8700 تەڭگەگە دەيىن وسەتىن بولادى.
«سونىمەن قاتار الكوگول ونىمدەرىن ەكسپورتتاۋ كەزىندە قوسارلانعان سالىق سالۋدى بولدىرماۋ جانە وتاندىق وندىرۋشىلەردىڭ باسەكەگە قابىلەتتىلىگىن ارتتىرۋ ءۇشىن ەتيل ءسپيرتى اكسيزىنىڭ نولدىك مولشەرلەمەسىن بەلگىلەۋ ۇسىنىلادى»، - دەدى مينيستر.
