سەرىك قوناقبايەۆ باستاعان ءبىرقاتار تانىمال تۇلعالار ليليا راح ءۇشىن كەپىل ەتتى

الماتى. قازاقپارات - سەرىك قوناقبايەۆ، داريا كلەبانوۆا، ءجاميلا ايىمبەتوۆا- توقمادي ليليا راحتىڭ كىناسىزدىگىنە كەپىل بەرەتىندەرىن ايتتى.

بۇل تۋرالى وسى ۋاقىتتا الماتى قالاسى المالى اۋداندىق سوتىندا ءوتىپ جاتقان ليليا راحتىڭ ىسىنە قاتىستى الدىن الا سوت تىڭداۋى بارىسىندا اتالمىش ايىپتالۋشىنىڭ ادۆوكاتى گاۋحار سالىمبايەۆا ءمالىم ەتتى، دەپ حابارلايدى قازاقپارات ءتىلشىسى.

«قىلمىستىق- پروتسەسسۋالدىق كودەكسكە سايكەس، قاماۋعا الۋدى كەپىلدىك قويۋ، ەشقايدا كەتپەۋ تۋرالى قولحاتپەن الماستىرۋعا بولادى. نەمەسە ءۇيقاماققا اۋىستىرۋ قاراستىرىلعان. بۇل جەردە ەشقايدا كەتپەۋ تۋرالى قولحاتقا نەگىز جوق دەپ ويلايمىز. سوندىقتان كەپىلدىكپەن بوساتۋ نەمەسە ءۇيقاماققا اۋىستىرۋدى دۇرىس دەپ ەسەپتەيمىز»، - دەدى ادۆوكات.

ەسكە سالايىق، الماتىلىق سانگەر ليليا راحتىڭ ۇستالعانى بۇعان دەيىن حابارلانعان بولاتىن. ول ادام ۇرلادى دەپ ايىپتالۋدا.

ل. راحقا قاتىستى قىلمىستىق ءىس 28 -قىركۇيەكتە المالى اۋداندىق سوتىنا ءتۇستى.

بۇعان دەيىن حابارلانعانداي، 2016 -جىلدىڭ 9 -شىلدەسىندە 33 جاستاعى وزبەكستان ازاماتىنىڭ جوعالىپ كەتكەندىگى تۋرالى پوليتسياعا ارىز تۇسكەن.

كەشەندى تەكسەرۋ شارالارى بارىسىندا ايىپتالۋشىلاردىڭ وزبەكستان ازاماتىن ۇرلاپ، قالاداعى جالدامالى پاتەرلەردىڭ بىرىندە قاماۋدا ۇستاعىنى انىقتالدى. پوليتسيا قىزمەتكەرلەرىنىڭ جەدەل ارەكەتىنىڭ ارقاسىندا جابىرلەنۋشى قامالعان مەكەن جاي انىقتالىپ، ول امان- ەسەن بوستاندىققا شىعارىلعان ەدى. وسى ىسكە قاتىسى بار دەگەن كۇدىكپەن ءتورت ادام ۇستالدى. ولار: ليليا راح، ميري پاز، يسلام مەسيروۆ جانە باحىت شالبايەۆ.

ليليا راح، 1962 -جىلى تۋعان. بايەر، Sauvage بۋتيگىنىڭ جانە «ليۋكس» دارەجەلى بىرنەشە دۇكەن يەسى.

 سونداي- اق بۇگىنگى الدىن الا سوت تىڭداۋىندا حامرو سۋۆانوۆتىڭ ادۆوكاتى جابىرلەنۋشى ليليا راحپەن بىتىمگە كەلگەنىن ايتىپ، ونى قىلمىستىق جاۋاپكەرشىلىكتەن بوساتۋدى سۇراعان ەدى.