بريتانيا اراب شەيحتارى مەن رەسەي وليگارحتارىنىڭ مۇلىكتەرىن تاركىلەمەك
زاڭ جوباسى نەگىزىنەن «كۇماندى جولمەن بايۋ» سەكىلدى جەمقورلىققا قارسى ۇعىمداردى قامتي وتىرىپ، شەت ەلدىك ولگارحتاردىڭ لوندونداعى جىلجىمايتىن مۇلىكتەرىن تاركىلەۋگە باعىتتالعان.
الەمدە باي جانە وتە باي ادامداردىڭ ءوز كاپيتالدارىن سالاتىن بىرنەشە ورتالىقتار بار. ولاردىڭ قاتارىندا لوندوننان باسقا موناكو، ليحتەنشتەين سەكىلدى ورتالىقتار كەڭىنەن تانىمال بولىپ تابىلادى.
ساراپشىلاردىڭ مالىمدەۋىنشە، لوندوندا ازاماتتىق قوعام جوعارى دەڭگەيدە دامىعاندىقتان جانە اتاقتى پاناما داۋىنان كەيىن ساياساتكەرلەر وسىنداي شەشىم قابىلداعان بولۋى مۇمكىن.
باسىلىمنىڭ حابارلاۋىنشا، بريتانيا بيلىگى مۇنداي قادامعا بارۋىنا افريكا، شىعىس ەۋروپا ەلدەرى، ورتا ازيا، رەسەي جانە قىتاي بايلارىنىڭ سالعان كاپيتالدارىنا قاتىستى كۇماننىڭ ارتۋى سەبەپشى بولىپ وتىر. جالپى، بۇل تاريحتا قايتالاناتىن قۇبىلىس. كوپشىلىكتىڭ، اسىرەسە وزگە مەملەكەتتەردىڭ كۇدىگىن تۋعىزباۋ ءۇشىن جەرگىلىكتى بيلىك وسىلايشا «ءبىر تەكسەرىس» جاساپ قويۋدى ادەتكە اينالدىرعان. ياعني، جىلجىمايتىن مۇلىك يەلەرى قاراجاتتى قايدان العانى تۋرالى ەسەپ بەرىپ، بۇرىنعىشا ءومىر سۇرە بەرمەك.
قازىرگى تاڭدا كاداسترلىق باعالاۋ قۇنى 170 ميلليارد فۋنت ستەرلينگتەن استام بريتاندىق جىلجىمايتىن مۇلىك وفشورلىق كومپانيالارعا تىركەلگەنىن كورسەتتى. ولاردىڭ ناقتى شىنايى يەلەرى جاسىرىن كۇيدە قالىپ وتىر.
ماماندار سىبايلاس جەمقورلىققا جانە اقشانى جىمقىرۋعا قارسى كۇرەس شەڭبەرىندە لوندوندا جۇزدەگەن ۇيلەر مەن پاتەرلەرگە مۇلىكتىك تىيىم سالىنۋى مۇمكىن.
سونىمەن قاتار، جاڭا زاڭ جوباسى كۇماندى بانك ەسەپ شوتتارىن، باعالى زاتتار مەن ونەر تۋىندىلارىن تۇتقىنداۋعا مۇمكىندىك بەرەدى.
