موڭعوليادا تەلەشوۋعا قاتىسقان قازاق بالاسىنا تورەشى قىز عاشىق بولدى
شىعۋ تەگى اعىلشىنداردان تاراعان الەمدىك تەلەۆيزيالىق جوبا «Mongolia's Got Talent» موڭعوليادا ەكىنشى رەت ءوتىپ جاتىر. ىرىكتەۋ ساتىسىنان ءوتىپ، ۇلانباتىر ساحناسىندا تورەشىلەر الدىنداعى العاشقى كەزەڭدە 19 جاسار قازاق بالاسى نۇربەك «مولدابايدىڭ ءانىن» ورىنداپ شىققان.
بۇل تۋرالى Caravan.kz تىلشىسىنە موڭعولياداعى قازاق بلوگەرى جاناربەك اقىبي حابارلادى.
موڭعوليانىڭ شوۋ جوباسىنا قازاق ءانى ورىندالىسىمەن 4 تورەشى تاڭ- تاماشا بولدى. قازىلار القاسىنداعى تانىمال سكريپكاشى دەگي تىكەلەي ەفيردە ءانشى نۇربەككە «ماعان قانشاما جىگىتەر عاشىق بولدى. سەن ماعان عاشىق بولمايسىڭ با؟» دەپ ۇسىنىس ايتتى. ال نۇربەك «الدىمداعى جارىقتان كورمەي تۇرمىن. جانىڭىزعا بارىپ ءجۇزىڭىزدى كورەيىن» دەگەن. تورەشىلەردەن رۇقسات الىپ ساحانادان ءتۇسىپ، وزىنە عاشىق بولىپ وتىرعان تورەشى دەگيگە ءبىر اۋىز سوزبەن ءان ارنادى. سودان كەيىن ءانشى «قازىر ستۋدەنتپىن. ماحابباتپەن باس اينالدىرار ۋاقىتىم جوق. بار زەيىنىمدى ساباعىما ءبولىپ ءجۇرمىن» دەدى. وقۋىمدى بىتىرگەن سوڭ بۇل سۇراققا جاۋاپ ىزدەيمىن» دەپ جاۋاپ بەرگەن. قازاق جىگىتىنىڭ بۇل جاۋابىنا بۇرتيعان تورەشى «سەن كەلەسى كەزەڭگە وتپەدىڭ» دەگەنىمەن قاسىنداعى ءۇش تورەشى «ەش ايتار ءسوزىمىز جوق ، تاڭعاجايىپ تالانت، دارىن سەنسىڭ» دەپ 3-1 ەسەبىمەن كەلەسى كەزەڭگە وتكىزگەن. موڭعول تەلەۆيزيالىق شوۋعا قازاق ءان- كۇيمەن كەلىپ ەلدى ءتانتى ەتكەن 19 جاسار جاس ءانشى عالامتوردا ەل نازارىن اۋدارتۋدا.
ايتا كەتەيىك، نۇربەك قىركۇيەكتە پاۆلوداردا ۇيىمداستىرىلعان «ۇلى دالا ەلى» فەستيۆالىنە شاقىرۋمەن كەلىپ، ءوز ونەرىن كورسەتىپ قايتقان ەدى.
