رۋسلان كۇلەكبايەۆتىڭ ءىسى قازاق تىلىندە ءوتىپ جاتىر- فوتو

الماتى. قازاقپارات - بۇگىن الماتىداعى تەرگەۋ اباقتىسىندا رۋسلان كۇلەكبايەۆتىڭ ىسىنە قاتىستى سوت تىڭداۋى ءوتىپ جاتىر، دەپ حابارلادى قازاقپارات ءتىلشىسى.

سوت قازاق تىلىندە ءوتىپ جاتىر. سۋديا ەرلان بولاتوۆتىڭ سۇراعىنا قىرسىعا جاۋاپ بەرىپ تۇرعان كۇلەكبايەۆتان قازا تاپقانداردىڭ تۋىسقاندارى قاتتى جاۋاپ بەرۋدى تالاپ ەتتى.

بۇعان كۇلەكبايەۆ: «قاجەت بولسا، جاقىن تۇرىڭدار» دەپ زەكىپ قالدى.

وعان زالدان: «ولتىرگەندى بىلەسىڭ، قاتتى سويلە!» دەپ ايقايلاعاندار بولدى. سوت زالدى تىنىشتىققا شاقىردى.

ايتا كەتەيىك، كۇلەكبايەۆ بىرنەشە قانقۇيلى توناۋ جانە قاراقشىلىق ارەكەتتەرگە قاتىستى بولىپ وتىر. تەرگەۋ توبى 57 سوت ساراپتاماسى مەن زەرتتەۋلەر جۇرگىزدى جانە بولعان وقيعانىڭ بارلىق جايتتەرىن انىقتاۋ ماقساتىندا 200 دەن استام كۋاگەرلەر مەن وقيعانى كورگەن ادامداردى تەرگەدى. 2016 -جىلدىڭ 12- قازانىندا 61 تومنان تۇراتىن قىلمىستىق ءىستىڭ ماتەريالدارىن زەرتتەۋ ناتيجەسى بويىنشا، سوتقا كۇلەكبايەۆ پەن وزگە دە ازاماتتار جولداندى. ر. كۇلەكبايەۆقا ناتيجەسى 8 قۇقىق قورعاۋ جانە ارنايى ورگانداردىڭ قىزمەتكەرلەرىنىڭ جانە 2 بەيبىت تۇرعىننىڭ ولىمىنە الىپ كەلگەن تەرروريستىك اكت جاسادى دەگەن ايىپ تاعىلدى. سونىمەن قاتار ول 3 بەيبىت تۇرعىندى ولتىرمەك بولدى دەپ ايىپتالىپ وتىر.

 ناقتىراق ايتقاندا، ايىپتالۋشىعا قاتىستى ق ر قىلمىستىق كودەكسىنىڭ (ق ر ق ك) 255-بابى 4-تارماعى (لاڭكەستىك اكت)، 99-بابى 2-تارماعى (ەكى نەمەسە ودان دا كوپ ادامدى ءولتىرۋ)، 24-بابىنىڭ 3-تارماعى (ءولتىرۋ ءۇشىن شابۋىل جاساۋ)، 192-باپ 4-تارماق (توپ ادامعا قاراقشىلىق شابۋىل)، 287-باپ 4-تارماق (زاڭسىز قارۋ تاسىمالداۋ)، 288-باپ 2-تارماق (قارۋدى زاڭسىز جاساۋ)، 291-باپ 4-تارماق (قارۋ ۇرلاۋ)، 200-باپ 4-تارماق (كولىك ۇرلاۋ)، 126-باپ 2-تارماق (ادامدى زاڭسىز باس بوستاندىعىنان ايىرۋ) بويىنشا قىلمىستىق ءىس قوزعالعان.

اۆتور: الماس مۇقاش ۇلى