الماتىلىق جىگىتتەر پاكتىگىن جوعالتقان ارۋلارعا قالاي قارايدى؟

 استانا. قازاقپارات - الماتىلىق بويداق جىگىتتەردىڭ جار تاڭداۋدا ءبىرىنشى كەزەكتە قىزدىڭ پاكتىگىنە اسا ءمان بەرەتىنى انىقتالدى.

پورتال جۇرگىزگەن الەۋمەتتىك ساۋالناماعا 18-33 جاستاعى 100 ەر ازامات قاتىستى. ساۋالناما ناتيجەسىنە ساي، ولاردىڭ 90 پايىزىنا جۋىعى قىزدىڭ ارىنىڭ تازالىعىنا قارايتىنى بەلگىلى بولدى.

دالىرەك ايتقاندا، 85 جىگىتكە قىزدىڭ ارى تازا، پاك بولعانى وتە ماڭىزدى.

9 جىگىت ءۇشىن قىزدىڭ پاكتىگى اسا ماڭىزدى ەمەس، ءبىراق، مەيلىنشە تازا بولىپ كەلگەنى دۇرىس دەپ ەسەپتەيدى.

ال، قالعان 6 ادامنان «ماعان ءبارىبىر» ، «قىزدىعىنا قارامايمىن» ، «ماڭىزدى ەمەس» دەگەن جاۋاپتار الىندى.

1-كۋرس ستۋدەنتى اكرام قىزدىڭ پاكتىگى جونىندە ويعا تۇيگەندەرىمەن ءبولىستى.

«مەنىڭ ءبىر جەردەن وقىعانىم بار: قىزبەن ەڭ ءبىرىنشى جاقىنداسقان ەركەكتىڭ قىلىقتارى الگى ايەلدىڭ باسقا جىگىتتەن تۋاتىن بالالارىنا بەرىلەدى ەكەن. ەگەر ءبىرىنشى جولاعان جىگىتى ناشاعا، ىشىمدىككە اۋەس بولسا، بولاشاق ۇرپاعى دا سونداي بولماق» ، - دەپ سەنەدى ستۋدەنت.

جىگىتتەردىڭ ايتۋىنشا «قىز ەمەس» بويجەتكەندەردى اجىراتۋ قيىن ەمەس. ولار قىزداردىڭ قىلىقتارىنان، سويلەگەن سوزدەرىنەن پاكتىگىن جوعالتقاندىقتارى ءبىلىنىپ تۇرادى دەيدى.

«ار- ۇياتى بار قىزدار كەشكە كوپ شىقپايدى، وتىرىستاردا تاڭعا دەيىن وتىرمايدى » ، - دەيدى ازامات.

ساۋالناماعا قاتىسقان ەراسىل قىزدىڭ تازا - تازا ەمەس ەكەندىگىن وزىنەن تىكەلەي سۇرايتىنىن جاسىرمادى.

 «وندا تۇرعان ەشتەڭە جوق، ويتكەنى مەن ءۇشىن ول ماڭىزدى» ، - دەيدى ول.

سونداي- اق، جىگىتتەر قىزدىڭ بويىندا وزدەرى جوعارى باعالايتىن قاسيەتتەردى اتادى. ولار: ادالدىق، اشىق مىنەز، مەيىرىمدىلىك، سىپايىلىق، قاراپايىمدىلىق.

جىگىتتەر قىزدى اينالاسى التى ايدىڭ ىشىندە تانىپ- بىلە الامىز دەپ وتىر.

 ساۋالناماعا قاتىسقان ەر ادامداردىڭ بارلىعى جار تاڭداۋدا قىزدىڭ اتا- اناسىنىڭ الەۋمەتتىك جاعدايىنا دا، قىزدىڭ قالتاسىنا دا قارامايتىن بولىپ شىقتى.

بويداق جىگىتتەر ءبىر اۋىزدان 25-27 جاستا وتباسىن قۇرىپ، وتاۋ تىگۋگە دايىن ەكەندىكتەرىن ايتتى.

NUR. KZ