ا ق ش- تا جەڭىل اتلەتيكادان الەم چەمپيونىنىڭ قىزىن اتىپ كەتتى

استانا. قازاقپارات - ا ق ش- تا جەڭىل اتلەتيكا بويىنشا سپرينتەرلىك قاشىقتىققا جۇگىرۋدەن ءۇش دۇركىن الەم چەمپيونى تايسون گەيدىڭ 15 جاسار قىزى ترينيتي اۋرۋحانادا كوز جۇمدى،

 دەپ حابارلايدى ر ي ا نوۆوستي.

 كەنتۋككي شتاتى لەكسينگتون قالاسى پوليتسياسىنىڭ مالىمدەۋىنشە، ءتارتىپ ساقشىلارى مەيرامحانالاردىڭ ءبىرىنىڭ ماڭىندا اتىس بولدى دەگەن اقپارات العان. كۋاگەرلەردىڭ ايتۋىنشا، جانجال شىعارعاندار ەكى ءتۇرلى كولىكتە بولعان. ساقشىلار ءبىر كولىكتى توقتاتىپ، ونداعى ەكى ادامدى تەرگەۋگە الىپ كەتكەن.

اتىس كەزىندە ءۇش رەت وق تيگەن ترينيتي گەي كەيىنىرەك كەنتۋككي ۋنيۆەرسيتەتىنىڭ مەديتسينالىق ورتالىعىندا العان جاراقاتتارىنان كوز جۇمعان.

 تايسون گەي 2007 -جىلعى جەڭىل اتلەتيكادان الەم بىرىنشىلىگىندە 100، 200 مەترلىك قاشىقتىقتا جانە 100 مەترگە 4 ادامدىق ەستافەتادا التىن مەدال العان داڭقتى سپورتشى.