ەكى قىتايلىق ازامات عارىشقا اتتانادى

استانا. قازاقپارات - قىتايدا «شەنچجوۋ-11» عارىش كەمەسىن ۇشىرۋ دۇيسەنبى كۇنىنە بەلگىلەندى، دەپ حابارلادى شينحۋا مەملەكەت اقپارات اگەنتتىگى.

عارىشقا ۇشاتىن ەكى عارىشكەر ءبىر ايعا جۋىق وربيتادا بولادى، بۇل قىتاي عارىشكەرلىگىندەگى رەكوردتى ۋاقىت.

بي- بي- سيدىڭ حابارلاۋىنشا، ۇشۋ الدىنداعى باسپا ءسوز كونفەرەنسياسىندا ق ح ر باسقارىلاتىن عارىشتىق ۇشۋ باعدارلاماسىنىڭ وكىلى ۋ پين عارىش كەمەسىنىڭ «تيانگۋن-2» زەرتحاناسىمەن تۇيىسەتىنىن حابارلادى.

قىتايدىڭ عارىش باعدارلاماسى 50 جىلدان بەرى جالعاسىپ كەلەدى. 1970 - جىلى ق ح ر ءوز تاريحىندا العاش رەت جاساندى جەر سەرىگىن ۇشىردى.

2003 -جىلى 15 - قازاندا عارىشكەر يان ليۆەي تۇڭعىش رەت «شەنچجوۋ-5» كەمەسىندە عارىشقا ۇشتى. 2008 -جىلى 27 - قىركۇيەكتە عارىشكەر چجاي چجيگان اشىق عارىشقا ءساتتى شىعا الدى.