جاس ۇلاندار داريعا نازاربايەۆاعا ءبىلىمدارلىعىن پاش ەتتى

الماتى. قازاقپارات - ق ر پارلامەنتى سەناتىنىڭ حالىقارالىق قاتىناستار جونىندەگى كوميتەتىنىڭ ءتوراعاسى داريعا نازاربايەۆا باستاعان سەنات دەپۋتاتتارى الماتى قالاسىنا جاساعان جۇمىس ساپارلارىنىڭ اياسىندا باۋىرجان مومىش ۇلى اتىنداعى رەسپۋبليكالىق «جاس ۇلان» مەكتەبىنە باردى، دەپ حابارلايدى قازاقپارات.

مەكتەپ وقۋشىلارى داريعا نازاربايەۆاعا مەملەكەتتىك ءتىل مەن شەت تىلدەرىن پايدالانا وتىرىپ، تەرەڭ بىلىمدەرىن تانىتتى. دەپۋتاتتار مەكتەپتىڭ جاعدايىمەن، وقۋشىلار تۇرىپ جاتقان جاتاقحانانىڭ جاعدايىمەن تانىستى.

«بالالاردىڭ تالابىن ايتا كەتۋ كەرەك، جوعارى سىنىپتا وقيتىن بالالار اقىل توقتاتىپ، ءتىپتى، ەرەسەك ومىرگە دايىن ەكەندەرىن كورسەتتى. وسى مەكتەپتە جاقسى ءبىلىم الىپ، دەنەلەرىن شىنىقتىرىپ ءجۇر. مەكتەپتى ءتامامداعان سوڭ اسكەري وقۋ ورنىندا وقۋعا دايىن»، - دەدى دەپۋتات م. التىنبايەۆ.

«جاس ۇلان» مەكتەبىنىڭ وقۋشىلارى كوميتەت ءتوراعاسى داريعا نازاربايەۆاعا گۇل شوقتارىن سىيلاپ، مۋزىكالىق اسپاپتاردى دا مەڭگەرگەندەرىن كورسەتكەن.

اۆتور: كەنجەكەي توقتامۇرات قىزى