استانا اكىمى قوستانايدان كەلگەن شارۋانى جەكە قابىلدايمىن دەپ ۋادە بەردى - فوتو
جاز بويى باپتاپ وسىرگەن كوكونىستەرىن استاناعا اكەلگەن باعبانداردىڭ ءبىرى ەلوردا اكىمى اسەت يسەكەشەۆتىڭ جەكە قابىلداۋىنا باراتىن بولدى، دەپ حابارلايدى قازاقپارات.
«سادوۆود» شارۋا قوجالىعىنىڭ يەسى ۆيكتور سيمونەنكو اسەت يسەكەشەۆ اكىم بولعاننان بەرى ءۇش ۇيىمعا حابارلاسىپ، ءوزىنىڭ ونىمدەرىن سۋپەرماركەت سورەلەرىنە دەلدالسىز تاسىپ تۇرۋعا كەلىسپەك بولعان. الايدا، بۇل ويىنان تۇك شىقپاپتى. شارۋانىڭ ايتۋىنشا، استاناداعى كوكونىستەردىڭ كوبى جاساندى وسىرىلگەن، ال، ماڭداي تەر توگىلگەن دالانىڭ جەمىسىن ءتىپتى ەكسپو كورمەسىنە كەلگەن قوناقتارعا ۇيالماي ساتۋعا بولاتىن ەدى دەيدى ول.
«كوكونىس نارىعىندا 28 جىل بويى جۇمىس ىستەپ كەلەمىن. ساپالى، ءدامدى كوكونىس وسىرەمىز. استانا قالاسىنىڭ سۋپەرماركەتتەرىنە اكەلىپ ساتقىمىز كەلەدى، ويتكەنى، كوكونىستەردىڭ ساپاسى وتە جوعارى. تىكەلەي سۋپەرماركەتتەرگە اكەلەيىك دەسەك، دەلدالسىز بولمايتىن سياقتى. مەنىڭ ويىمشا، استانا تۇرعىندارىنا تاڭداۋ بەرىپ، دۇكەن سورەلەرىنە ءارتۇرلى ءونىم قويعان دۇرىس»، - دەدى ول جارمەڭكەنى ارالاۋعا كەلگەن ءا. يسەكەشەۆتىڭ الدىندا.
ايتا كەتەيىك، بۇل شارۋا قوجالىعى جىلىنا سەگىز مىڭ توننا ءونىم شىعارادى ەكەن. قازىر قوستانايداعى بارلىق امبەباپ دۇكەنگە، اقتوبە قالاسىنداعى بىرنەشە دۇكەنگە ءوز ءونىمىن شىعارىپ ساتادى. دەلدال ارقىلى استانا نارىعىنا شىعا باستاعان، دەلدالدار ءونىمدى كوكشەتاۋ، پاۆلودار، الماتى قالالارىنا ساتىپ ءجۇر.
«كەلەسى اپتانىڭ سارسەنبىسى نەمەسە بەيسەنبىسى كۇنى كەلىڭىز، مەن ءسىزدى ءوزىم جەكە قابىلدايمىن. استانالىقتار جىلىنا شامامەن 540 مىڭ توننا كوكونىس پايدالانادى، كەلەسى جىلى بۇل كورسەتكىش 700-750 مىڭ تونناعا جەتەتىن شىعار. سوندىقتان، ءبىزدىڭ دە مۇددەمىز بار»، - دەدى اكىم باعبانمەن سويلەسە تۇرىپ.
جالپى، قوستاناي وبلىسى استاناعا 100 ءتۇرلى ازىق- تۇلىك تۇرىنەن 400 مىڭ توننا ءونىم اكەلگەن. «جارمەڭكەدەگى ازىق- تۇلىكتىڭ باعاسى استانا نارىعىنان 15 پايىزعا ارزان. جالعىز جارمەڭكەمەن شەكتەلمەيمىز، قازىر استانا اكىمدىگىمەن مەموراندۋمعا قول قويىپ، دەلدالسىز شاپاعات بازارىنا جەمىس- جيدەك اكەپ ساتاتىن بولدىق. كەلەسى اپتادا استاناعا وبلىسىمىزدىڭ 10-15 تاۋار ءوندىرۋشىسى كەلەدى»، - دەيدى قوستاناي وبلىسىنىڭ اكىمى ارحيمەد مۇحامبەتوۆ.
اۆتور: كەنجەكەي توقتامۇرات قىزى
