قوستانايدا تەاتر باسشىسى نەمەرەسىنىڭ تويىن ونەر ۇيىمىنىڭ قارجىسىنا وتكىزگەن

استانا. قازاقپارات - قازىر قوستاناي وبلىستىق ءى. وماروۆ اتىنداعى قازاق دراما تەاترىنىڭ بۇرىنعى ديرەكتورى نۇرلان ەرەكەشەۆكە، باس بۋحالتەر گۇلزادا بەكتۇرسىنوۆاعا جانە كاسسير- بۋحالتەر مەڭسۇلۋ كۇلتايەۆاعا قاتىستى سوت ءىسى جالعاسۋدا، دەپ حابارلايدى «ەگەمەن قازاقستان» گازەتى.

بۇرىنعى ديرەكتور، باس بۋحالتەر جانە كاسسير- بۋحالتەر ۇيىمداسىپ، تەاترعا بولىنگەن 163 ميلليون تەڭگەنى تالان- تاراجىعا سالعان. ولار اي سايىن بانكتەن العان قارجىنىڭ ەداۋىر بولىگىن ءبولىسىپ وتىرعان. ونىڭ 80 پايىزى ديرەكتورعا، قالعان 20 پايىزى باس بۋحالتەر مەن كاسسير- بۋحالتەرگە تيەسىلى بولعان.

سوتتا ءمالىم بولعانداي، بۇرىنعى ديرەكتور 2005 -جىلدان 2016 -جىلى تەاتردان كەتكەنگە دەيىن وعان تەاتر قارجىسى ەسەبىنەن كابينەتىنە تۇستىك دايىندالعان. ءۇش بولمە ءۇيىنىڭ كوممۋنالدىق قىزمەتى ءۇشىن تولەمىنىڭ بارلىعى تەاتر ەسەبىنەن تولەنگەن. استاناداعى نەمەرەسىنىڭ ءبىر جاسقا تولۋ تويىنا ءبىر ميلليوننان استام تەڭگە اقشا دا تەاتر ەسەبىنەن جۇمسالعان. قوستانايدان شاقىرىلعان كىسىلەردىڭ پويىزعا بيلەتى دە تەاتر ەسەبىنەن الىنعان.

تەاتر باسشىلىعى سپەكتاكلدەرگە بيلەت ساتۋدان تۇسەتىن قارجىنى وتىرىك ءوسىرىپ كورسەتىپ كەلگەن. تەاتر تابىسىنىڭ جوسپارى «ورىندالعاندىقتان» ديرەكتوردىڭ جالاقىسىنا ايىنا 50 پايىزعا دەيىن ۇستەمە اقشا قوسىلعان. ونىڭ سىرتىندا جوسپاردى «ورىنداعان» تەاتر ۇجىمىنا جىلىنا ەكى رەت سىياقى تولەنگەن. بۇل كورسەتىلگەن فاكتىلەر تەاتر باسشىسى، باس بۋحالتەرى مەن كاسسيرىنە تاعىلعان ايىپتىڭ وننان ءبىرى عانا دەۋگە بولادى.