اياق كيىممەن ناماز وقۋعا بولا ما؟

استانا. قازاقپارات - قىس ايلارىندا كەيدە جۇما نامازىن مەشىتتىڭ سىرتىندا وقۋعا تۇرا كەلەدى. كۇن سۋىق بولعاندىقتان، اياق كيىمدى شەشپەيمىز.

سۋىق تيگىزىپ الماۋ ءۇشىن اياق كيىممەن ناماز وقۋعا بولا ما؟

امر بين شۇعايىب اكەسىنەن جانە اتاسىنان ريۋايات ەتەدى: «مەن اللا ەلشىسىنىڭ (س. ع. س. ) جالاڭ اياق جانە اياق كيىمدە ناماز وقىعانىن كوردىم[1]».

ال، ءابۋ ساعيد ءال- حۋدري (ر. ا. ) مىناداي جايتتى ريۋايات ەتەدى: «پايعامبار (س. ع. س. ) اياق كيىمىن شەشكەن سوڭ، ادامدار دا كەبىستەرىن شەشتى. پايعامبار (س. ع. س. ) نامازىن ءبىتىرىپ: «كەبىستەرىڭدى نەگە شەشتىڭدەر؟» - دەپ سۇرادى. ادامدار: «ءسىزدىڭ شەشكەنىڭىزدى كورىپ، ءبىز دە شەشتىك»، - دەدى. پايعامبار (س. ع. س. ): «ماعان جابىرەيىل كەلىپ، اياق كيىمىمدە ءبىر جامان نارسە بارىن جەتكىزدى. سەندەر مەشىتكە كەلسەڭدەر، اياق كيىمدەرىڭنىڭ تابانىنا قاراڭدار. جامان نارسە (ءناجىس) بولسا جەرگە ىسقىلاپ، ونىمەن (كەبىستى شەشپەي-اق) ناماز وقي بەرىڭدەر[2]».

تۇيىندەي ايتقاندا، سۋىق كۇندەردە اياق كيىممەن ناماز وقۋعا رۇقسات ەتىلەدى. ەڭ باستىسى، اياق كيىمنىڭ تابانىندا ءناجىس بولماۋى كەرەك. ءناجىس بولعان كۇننىڭ وزىندە قارعا نەمەسە باسقا نارسەگە تازالاپ العان سوڭ وقي بەرۋگە بولادى.

[1] احمەد، ءابۋ داۋد، يبن ءماجا

[2] احمەد، ءابۋ داۋد، بايھاقي

muslim.kz