ءدىن سالاسىندا تۇجىرىمداما ازىرلەۋ مەملەكەتتىڭ دىننەن ءبولىنۋ قاعيداتىنا قايشى كەلمەيدى - ەرمەكبايەۆ
بۇل تۋرالى ورتالىق كوممۋنيكاتسيالار قىزمەتىندەگى بريفينگتە ەلىمىزدىڭ ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆ ءمالىم ەتتى، دەپ حابارلايدى قازاقپارات.
«ءدىن سالاسىنداعى ەڭ ماڭىزدى مىندەت - ەلىمىزدىڭ دامۋىنىڭ زايىرلى قاعيداتىن قامتاماسىز ەتۋ جانە نىعايتۋ. ياعني، ازاماتتاردىڭ ار- وجدان بوستاندىعىن بۇلجىتپاي كەپىلدەندىرۋ، ونىڭ ءدىندى تاڭداي الۋ نەمەسە دىننەن باس تارتا الۋ قۇقىعىن قامتاماسىز ەتۋ - ءبىزدىڭ زايىرلىق مودەلىمىزدىڭ اينىماس نەگىزى رەتىندە قالا بەرەدى. وسى تۇرعىدان العاندا، قوعامىمىزدا بەرىك ورنىققان كونفەسسياارالىق كەلىسىمدى ودان ارى نىعايتۋ ءدىني بىرلەستىكتەرمەن بىرلەسكەن جۇمىسىمىزدىڭ اسا ماڭىزدى باعىتى بولىپ قالا بەرەدى»، - دەدى ول.
مينيستر وسى رەتتە ەلىمىزدە ءدىن سالاسىن دامىتۋ تۋرالى تۇتاستاي تۇسىنىك قالىپتاستىرۋ ءۇشىن ءدىن سالاسىنداعى مەملەكەتتىك ساياسات تۋرالى تۇجىرىمدا ازىرلەۋ كوزدەلىپ وتىرعاندىعىن ايتتى. بۇل قۇجاتتا مەملەكەتتىڭ ءدىن سالاسىنداعى ۇستانىمى، ستراتەگيالىق ماقساتتارى جانە جۇمىس باعىتتارى ايقىندايتىن بولادى. قۇجاتتى ازىرلەۋگە ساراپشىلار، ءدىنتانۋشىلار، ازاماتتىق قوعام وكىلدەرى تارتىلىپ، ونى قوعامنىڭ قاتىسۋىمەن اشىق تۇردە تالقىلاۋ جوسپارلانعان.
«تۇجىرىمداما نەگىزىندە ءدىني قىزمەت تۋرالى زاڭناماعا ەنگىزىلەتىن وزگەرىستەر مەن تولىقتىرۋلاردى دايىندايتىن بولامىز. ۇيىمداستىرۋشىلىق جانە زاڭنامالىق شارالار مەملەكەت پەن قوعامنىڭ زايىرلىلىعىن ودان ارى نىعايتۋعا باعىتتالادى. بۇل ءدىني ءبىلىم الۋ ءتارتىبىن رەتتەۋدى، جاسوسپىرىمدەردى ءدىني قىزمەتكە زاڭسىز تارتۋعا جول بەرمەۋدى، ءدىني ادەبيەتتەردى تاراتۋ ءتارتىبىن جەتىلدىرۋدى قاجەت ەتەدى. ءبىز ءدىندار ادامدارعا ءدىني راسىمدەرىن وتەۋ ءۇشىن قولايلى جاعدايلار جاسايتىن بولامىز»، - دەدى ول.
سونىمەن قاتار ەرمەكبايەۆ وزىنەن ءدىن سالاسىنداعى تۇجىرىمداما ازىرلەۋ مەملەكەتتىڭ دىننەن ءبولىنۋ قاعيداتىنا قايشى كەلمەي مە دەپ سۇرايتىنداردىڭ كوپ ەكەندىگىن ايتىپ، وعان ناقتى جاۋاپ تا بەردى.
«مەنىڭشە، مۇندا قانداي دا ءبىر قايشىلىق جوق. ويتكەنى بۇگىنگى كۇندە ءدىني بىرلەستىكتەر قوعامدىق ومىردەگى شىنايىلىق، ازاماتتىق قوعامنىڭ ءبىر بولىگى. ال مەملەكەت ولاردىڭ قىزمەت اتقارۋى ءۇشىن قۇقىقتىق جاعدايلار مەن ورتا قالىپتاستىرۋدا. وسى تۇرعىدان العاندا، تۇجىرىمداما - بۇل مەملەكەت پەن ءدىني بىرلەستىكتەر اراسىنداعى قاتىناستارعا كوزقاراستار جۇيەسى، زايىرلىلىق قاعيداتىنىڭ تۇعىرى دەر ەدىم»، - دەدى مينيستر.
اۆتور: مارلان جيەمباي
