كەيكى باتىردىڭ باس سۇيەگىن قالپىنا كەلتىرۋ جۇمىسى باستالدى
بۇل تۋرالى ماجارستانداعى ق ر ەلشىسى نۇرباق رۇستەموۆ فەيسبۋك الەۋمەتتىك جەلىسىندە حابارلاپ وتىر.
«ۆەنگريانىڭ جاراتىلىستانۋ عىلىمدارى مۋزەيىندە قازاقستان رەسپۋبليكاسىنىڭ ورتالىق مەملەكەتتىك مۋزەيىنىڭ ديرەكتورى نۇرسان ءالىمباي ۆەنگريا مۋزەيىنىڭ باس ديرەكتورى زولتان كورشوشقا د ن ك ساراپتاماسىن جۇرگىزىپ، قالپىنا كەلتىرۋ ءۇشىن كەيكى باتىردىڭ باس سۇيەگىن تاپسىردى. مۋزەيدىڭ انتروپولوگيالىق بولىمىنە جەتەكشىلىك ەتەتىن اگنەش كۋشتار كەيكى باتىردىڭ باس سۇيەگىن قالپىنا كەلتىرۋ جۇمىستارىن ءوز باسشىلىعىنا الدى»، - دەپ حابارلاعان ەلشى ن. رۇستەموۆ.
كەزدەسۋ بارىسىندا ن. ءالىمباي ماجارلىق عىلىمدارعا 1916 -جىلعى ۇلت- ازاتتىق قوزعالىسىنا تويتارىس بەرگەن كەيكى باتىردىڭ باس سۇيەگى 93 جىل وتكەن سوڭ وتانىنا قايتارىلعانىن جانە دە باتىردىڭ باس سۇيەگىن قالپىنا كەلتىرۋ قازاقستان ءۇشىن تاريحي وقيعا ەكەنىن اتاپ وتكەن.
بۋداپەشتەگى مۋزەيدىڭ باس ديرەكتورى زولتان كورشوش بولسا، وسىنداي تاريحي مىندەتتى سەنىپ تاپسىرعان قازاقستاندىقتارعا العىس ايتىپ، ماجارلىق عالىمدار سوڭعى تەحنولوگيالاردىڭ ارقاسىندا ساپالى جۇمىس اتقاراتىنىنا سەندىردى.
«ايتا كەتۋ كەرەك، ۆەنگريانىڭ جاراتىلىستانۋ عىلىمدارى مۋزەيىنە بيىل 214 جىل تولدى. مۋزەي ىشىندە 10 ميلليونعا جۋىق ەكسپونات بار. ال انتروپولوگيالىق ءبولىم 70 رەت ادامنىڭ باس سۇيەگىن قالپىنا كەلتىرەتىن تاسىلمەن جۇمىس ىستەگەن، سونىڭ ىشىندە ءابىلحايىر حاننىڭ دا باس سۇيەگىن قالپىنا كەلتىرگەن»، - دەپ حابالادى ەلشى.
اۆتور: كەنجەكەي توقتامۇرات قىزى
