الماتى وبلىسىندا قازا بولعان ءۇش اعايىندى جىگىتتىڭ ولىمىنە قاتىستى جاڭا دەرەك شىقتى

 استانا. قازاقپارات - الماتى وبلىسىندا مال ساۋدالاپ، ارتىنشا ءمايىتى تابىلعان اعايىندىلاردىڭ ولىمىنە قاتىسى بارلار ەكەۋدەن كوپ دەپ حابارلايدى ك ت ك ارناسى.

بۇل تۋرالى سول قاندى وقيعا بولعان سۇرانشى باتىر اۋىلىنىڭ تۇرعىندارى ايتىپ وتىر. اۋىلعا 40 باس سيىر جانە كۇدىكتىلەرمەن قوساقتاسىپ كەلگەن ءبىر توپ بوتەن جىگىتتى كورگەندەر دە بار ەكەن. ءبىراق پوليتسيا ۇستاعان ەكى ادام مەن تاپقان ءبىر مىلتىعىنان ارىگە بارعىسى كەلمەيتىن سىڭايلى.

ۇلى ءۇش ادام ءولتىردى دەپ ايىپتالىپ جاتقان انا ۇلىنىڭ مۇنداي قىلمىسقا بارعانىنا سەنبەي وتىر. كورشىلەرىنىڭ كوزىنە تۇسپەۋگە تىرىسىپ، كۇندە جىلاۋمەن ءجۇر. التى بالا وسىرگەن زەينەتكەر پەرزەنتىنىڭ ءوزى پەندەگە زيان كەلتىرۋى مۇمكىن ەمەس دەيدى. ايتۋىنشا، بىرەۋلەر مۇرات وڭالبايەۆتى قورقىتقان.

«مەنىڭ بالامنىڭ دەنساۋلىعى جوق. 3- توپتاعى مۇگەدەك. باسىندا جاراقاتى بار. ءبىر كوزى جوق. ءوز جانىن ءوزى زورعا باعىپ جۇرگەن جىگىت. ءبىر كىسىنى ۇرىپ جىعاتىن كۇشى جوق. ەندى ول جەردەن ءتىرى شىعا ما تەگى، ءتاڭىرىم دەسەي؟ »، - دەيدى كۇدىكتىنىڭ اناسى مۇرات وڭالبايەۆتىڭ اناسى كۇلان وڭالبايەۆا.

جارقىنبەك، قادىلبەك، مۇقيات ەسىمدى ءۇش اعايىندى مال بازارىنان شىققان بويدا ەكىنشى كۇدىكتى تالعات سۇلەيمەنوۆتىڭ ۇيىنە كىرگەن. ءۇي يەسىنىڭ 20 باس قويى، جىلقىسى بار ەكەن. تاعى مال الۋعا بانكتەن سول كۇنى 3 ميلليون تەڭگە نەسيە راسىمدەپتى. ال مارقۇم اعايىندىلار مۇندا 6 ميلليون الامىز دەپ كەلگەن. ءبىراق كۇدىكتىدە قالعان اقشا بولدى ما، الدە ساۋداگەرلەردى الداپ اكەلگەن بە، بۇل ءتۇيىن ءالى شەشىلمەگەن كۇيدە قالدى.

مارقۇم 3 جىگىت كەلگەندە كۇدىكتىنىڭ وتباسى ءتورت كوزى تۇگەل ۇيىندە وتىرعان. ءبىراق ەشبىرى دە وقيعا تۋرالى ءتىس جارماي وتىر. دەسە دە، سول كۇنى اۋىلعا سيىرمەن بىرگە ەرىپ كەلگەن ءبىر توپ بوتەن ادامدى كورگەندەر كوپ.

سۇرانشى باتىر اۋىلىنىڭ تۇرعىنى شامەن قىرعىزبايەۆتىڭ ايتۋىنشا، 4-5 جىگىت بولعان. ولاردىڭ بارلىعى اۋىل ادامدارى ەمەس، بوتەن كىسىلەر ەكەن. ولار مالداردى جارتى ساعات بويى ءتۇسىرىپ، ماناعى ۇيدەگى جىگىتتەرمەن اڭگىمەلەسكەن ەكەن.

سيىردىڭ تەڭ جارتىسىن ۇيلەرىندە قالدىرسا، ال قالعان جارتىسىن جۇك كولىكتەرىنە تيەپ كۇدىكتىلەر مىنە وسى جولمەن تاۋعا قاراي اكەتىپتى. ال تاۋعا كىرەبەرىس جەردە شەكارا زاستاۆاسى تۇر. مارقۇمداردىڭ تۋىستارىنىڭ ايتۋىنشا، قازاق- قىرعىز اراسىن كۇزەتكەندەردىڭ ءتۇن ورتاسىندا ولاردى كورمەۋى مۇمكىن ەمەس. سول سەبەپتى، وسى قاندى قىلمىسقا قاتىسى بار وزگە دە سىبايلاستاردى ىزدەپ تابۋعا شەكاراشىلار دا كومەكتەسسە دەپ وتىر.

قاندىقول ۇرىلار ارام ويىن وسى تاۋدىڭ ىشىندە ىسكە اسىرعان. ازىرگە ەكى ادام قاماۋدا وتىر. ال پوليتسيانىڭ ءبىر مىلتىقتان باسقا دايەگى دە جوق سىڭايلى. تەرگەۋدىڭ باستالعانىنا ءۇش اپتاداي ۋاقىت بولسا دا، ساراپتاما ناتيجەسىن ءالى كۇتىپ ءجۇرمىز دەگەن جاۋاپ قانا ايتىپ وتىر.