الماتى وبلىسىنداعى كوكسۋ قانت زاۋىتى بيىلعى جىلدىڭ العاشقى ءونىمىن شىعاردى - فوتو

تالدىقورعان. قازاقپارات - الماتى وبلىسىنداعى كوكسۋ قانت زاۋىتى بيىلعى جىلدىڭ العاشقى ءونىمىن الدى، دەپ حابارلايدى قازاقپارات ءتىلشىسى.

كاسىپورىن قۇرال- جابدىعىن جاڭارتىپ، باسقارۋ جۇيەسىن تولىعىمەن كومپيۋتەرگە كوشىردى. جەتىسۋلىق قىزىلشا وسىرۋشىلەر بيىل 6800 گەكتارعا ءتاتتى ءتۇبىر سەپتى. ونىمدىلىك تە جامان ەمەس. كەيبىر شارۋاشىلىقتار گەكتارىنان 700 سەنتنەردەن الۋدا. قازىر زاۋىتتىڭ قانت قىزىلشاسىن قابىلدايتىن ورتالىعىندا ءوڭىردىڭ 7 اۋدانىنان كەلگەن جۇك كولىكتەرى ءونىمىن وتكىزۋدە.

زاۋىت باسشىلارى شارۋالارمەن 3 كۇن ىشىندە ەسەپ ايىرىسۋدا. جاڭعىرتۋ جۇمىستارىنان كەيىن كاسىپورىن تاۋلىگىنە 2000 توننا قانت قىزىلشاسىن وڭدەيتىن قۋاتقا جەتتى. بيىل شامامەن 30 مىڭ توننا قۇمشەكەر الۋ جوسپارلانعان. 2020 -جىلعا دەيىن الماتى وبلىسىندا قانت قىزىلشاسى القابىن 14 مىڭ گەكتارعا جەتكىزۋ جوسپارلانىپ وتىر.

سامال قابىشيەۆا