قازاقستان مەن قىتاي حالىقارالىق تاسىمالعا رۇقسات بەرۋ جۇيەسىن وزگەرتتى

بەيجىڭ- ۋحان. قازاقپارات - ق ر ينۆەستيتسيالار جانە دامۋ ۆيتسە- ءمينيسترى بەرىك كاماليەۆ پەن قىتايدىڭ كولىك ءمينيسترىنىڭ ورىنباسارى ليۋ سياومين حالىقارالىق اۆتوموبيل تاسىمالدارىنا رۇقسات بەرۋدىڭ جاڭا جۇيەسىن قۇرۋ تۋرالى جاڭارتىلعان حاتتاماعا قول قويدى، دەپ حابارلايدى قازاقپارات.

قۇجاتقا قازاقستاننىڭ قىتايداعا ەلشىلىگىنىڭ قولداۋىمەن 2016 -جىلدىڭ 10-12 - قازانى ارالىعىندا حۋبەي پروۆينتسياسىنىڭ ۋحان قالاسىندا وتكەن كولىك ىنتىماقتاستىعى جونىندەگى قازاقستان- قىتاي كىشى كوميتەتىنىڭ 10- ءماجىلىسى بارىسىندا قول قويىلدى.

1993 -جىلدىڭ 27 - اقپانىندا قول قويىلعان وسىعان دەيىنگى حاتتاماعا (رۇقسات بەرۋدىڭ ءۇش ءتۇرى بار: «ا» - جولاۋشىلار مەن جۇكتى تۇراقتى تاسىمالداۋ، «ب» - جولاۋشىلار مەن جۇكتەردى تۇراقتى ەمەس تاسىمالداۋ، «س» - جۇكتەردى تاسىمالداۋ) قاراعاندا، جاڭارتىلعان رەداكسيادا رۇقسات بەرۋدىڭ ءتورتىنشى ءتۇرى قاراستىرىلادى. ول جۇكتەردى ناقتى ءبىر باعىتتار بويىنشا باراتىن جەرىنە دەيىن جانە ودان بەرى قاراي الىپ كەلۋ قۇقىعى نەگىزىندە اۆتوموبيل ارقىلى تاسىمالداۋدى جۇزەگە اسىرۋ كەزىندە پايدالانىلادى.

ءماجىلىس بارىسىندا تاراپتار ەكى ەل اراسىنداعى قول قويىلعان «نۇرلى جول» مەن «جىبەك جولى ەكونوميكالىق بەلدەۋىن» بىرىكتىرۋ جونىندەگى جوسپاردىڭ كولىك سالاسى بويىنشا ىنتىماقتاستىق ماسەلەلەرىن جۇزەگە اسىرۋعا قاتىستى جاقتارىن جان- جاقتى دايىنداۋعا كەلىستى.