باسپانا قۇرىلىسىندا بيىلعى جوسپار ورىندالادى - بايتەرەك حولدينگى
بۇل تۋرالى بۇگىن پارلامەنت ماجىلىسىندە «نۇرلى جول» باعدارلاماسىنا بولىنگەن قاراجاتتى جانە ۇلتتىق قور قارجىسىنىڭ ءتيىمدى جۇمسالۋىن باقىلاۋ جونىنىدەگى «نۇر وتان» پارتياسى فراكسياسى جانىنداعى كوميسسيانىڭ وتىرىسىندا ءمالىم بولدى.
«بايتەرەك» حولدينگىنىڭ ەنشىلەس ۇيىمدارى - قازاقستاننىڭ يپوتەكالىق كومپانياسى مەن بايتەرەك دەۆلوپمەنت «نۇرلى جول» باعدارلاماسى اياسىندا جالعا بەرىلەتىن جانە نەسيەلىك تۇرعىن ءۇي قۇرىلىسى بويىنشا وپەراتورلار بولىپ تابىلادى. 2015 -جىلى 401 مىڭ شارشى مەترلىك جالعا بەرىلەتىن تۇرعىن ءۇي بويىنشا جوسپاردى ورىنداۋ كەزىندە 425,5 مىڭ شارشى مەتر پايدالانۋعا بەرىلدى.
2016 -جىلى حولدينگ الدىنا جىل سوڭىنا دەيىن پايدالانۋعا تاپسىرىلاتىن 326 مىڭ شارشى مەتردى قۇرايتىن باسپانانى سالۋ مىندەتى قويىلدى. اتاپ ايتقاندا، جالعا بەرىلەتىن تۇرعىن ءۇيدى پايدالانۋعا بەرۋ جونىندە بيىلعى مىندەتتى تولىق كولەمدە ورىنداۋ جوسپارلانۋدا»، - دەدى «بايتەرەك» ۇ ب ح» ا ق باسقارۋشى ديرەكتورى قايىربەك وسكەنبايەۆ.
ەستەرىڭىزگە سالا كەتەيىك، «نۇرلى جول» باعدارلاماسىنا سايكەس، جالعا بەرىلەتىن تۇرعىن ءۇي جەرگىلىكتى اتقارۋشى ورگانداردا كەزەكتە تۇرعانداردىڭ اراسىندا عانا ۇلەستىرىلەدى. ساتىپ الۋ قۇقىعىمەن جالعا بەرىلەتىن باسپانا باستاپقى جارناسىز 20 جىلعا دەيىن بەرىلەدى. تۇرعىن ءۇيدى جالداۋ قۇنى استانا مەن الماتى قالالارىندا 1 شارشى مەتر ءۇشىن 1120 تەڭگە، ال قالعان وڭىرلەردە ءاربىر شارشى مەترى ءۇشىن جالداۋ قۇنى 930 تەڭگەدەن اسپايدى.
«مىسالى، استانادا اۋدانى 50 شارشى مەتر 2 بولمەلى پاتەردى ساتىپ الۋ قۇقىعىمەن جالعا الۋدىڭ قۇنى ايىنا شامامەن 56 مىڭ تەڭگەنى قۇرايدى»، - دەدى باسقارۋشى ديرەكتور.
ەكونوميكانى جاڭعىرتۋ ماسەلەلەرى جونىندەگى مەملەكەتتىك كوميسسيانىڭ شەشىمىنە سايكەس، بايتەرەك ديەۆلوپمەنت ارقىلى جالعا بەرىلەتىن جانە نەسيەلىك تۇرعىن ءۇيدى سالۋعا بيىل ۇلتتىق قوردان قوسىمشا 113 ملرد تەڭگە ءبولىندى، ونىڭ 25 ميلليارد تەڭگەسى ەكونوميكالىق ءوسىمدى ىنتالاندىرۋ جونىندەگى قىسقا مەرزىمدى شارالارعا ۋاقىتشا ۇلەستىرىلدى. حولدينگە بولىنگەن قاراجات ەسەبىنەن 2016-2017 -جىلدارى جالعا بەرىلەتىن تۇرعىن ءۇيدىڭ 324,1 مىڭ شارشى مەترىن جانە نەسيەلىك باسپانانىڭ 366,9 مىڭ شارشى مەترىن تاپسىرۋ مىندەتى قويىلدى.
«بۇگىندە 2016-2017 -جىلدارى ەنگىزىلەتىن 78,9 ميلليارد تەڭگە سوماسىنا 498,3 مىڭ شارشى مەتردى (8 289 پاتەردى) سالۋعا شارتتار جاسالدى. بۇدان باسقا، 39,6 ميلليارد تەڭگە سوماسىنا 225,4 مىڭ شارشى مەتردى (3 346 پاتەر ) قۇرايتىن جوبالار پۋلى بار. ولار بويىنشا مەموراندۋمدارعا قول قويىلدى...
ءبىز قۇرىلىستىڭ قۇنىن 1 شارشى مەتر ءۇشىن وڭىرلەردە 180 مىڭ تەڭگەدەن اسىرمايتىن، سونداي- اق استانا، الماتى، اتىراۋ جانە اقتاۋدا 200 مىڭ تەڭگەگە دەيىن ۇسىناتىن قۇرىلىس سالۋشىلارمەن بارىنشا بىرلەسىپ جۇمىس ىستەۋگە دايىنبىز»، - دەدى ق. وسكەنبايەۆ.
بۇل رەتتە باسپانانىڭ جالپى اۋدانى 80 شارشى مەتردەن اسپاۋى ءتيىس.
