اتىراۋ وبلىسىنىڭ اكىمى ءوز كومەكشىلەرىنىڭ دارمەنسىزدىگىن سىنعا الدى
قۇرىلىسى توقتاپ قالعان عيماراتتاردى ارالاپ شىققان ءوڭىر باسشىسى شەنەۋنىكتەرگە وسىنداي باعا بەردى. وبلىس اكىمىنىڭ ورىنباسارى تيمۋر شاكىموۆ، اتىراۋ قالاسىنىڭ اكىمى سەرىك شاپكەنوۆ جانە قۇرىلىسقا جاۋاپتى تۇلعالار مەن مەردىگەرلەر، جوبالاۋشىلار دا ءوڭىر باسشىسىمەن بىرگە ءجۇردى.
العاشقى ايالداما «بەرەكە» تۇرعىن ءۇيى بولدى. ول «قولجەتىمدى باسپانا-2020» باعدارلاماسى بويىنشا تۇرعىزىلۋدا. نىساندا 507 پاتەرى بار كوپقاباتتى 11 ءۇيدىڭ قۇرىلىسى ءجۇرىپ جاتىر. الايدا، باستاپقىدا بۇل ساندار كوبىرەك بولعان. جوباداعى قاتەلىككە بايلانىستى ءۇي سانى كەمىگەن. كەيىن انىقتالعانداي، تۇرعىن ءۇي كەشەنىنىڭ اۆتورى - «اتىراۋ ستروي پروەكت» ۇيىمى جاقىندا جاۋاپسىز مەردىگەر دەپ تانىلىپ، ليتسەنزياسىنان ايىرىلعان. مۇنى ەستىگەن نۇرلان نوعايەۆ قول استىنداعى كومەكشىلەرىن سىنعا الدى.
«ەندى قاتە جوبالاۋدان «نۇرلى جول» باعدارلاماسى بويىنشا قارجى ءوز ۋاقىتىندا يگەرىلمەيدى. نەگە بۇلاي بولدى، بۇل ماسەلەنى كىم قاداعالادى؟ جوبا جاي عانا سۋرەت ەمەس، جوبا بولۋى ءتيىس. جۇمىستىڭ توقتاپ قالۋىنا نەگە مەردىگەر جاۋاپ بەرۋى ءتيىس، كۇتپەگەن شىعىندى نەگە ولار تولەۋى ءتيىس؟» - دەدى اكىم.
اڭگىمە بارىسىندا، وبلىستىق قۇرىلىس ءبولىمىنىڭ باسشىسى تىلەك ماحۋوۆتىڭ نىسانعا ءبىر رەت تە كەلمەگەنى، قۇرىلىس بارىسىمەن مۇلدەم تانىسپاعانى بەلگىلى بولدى. ماحۋوۆتىڭ ايتۋىنشا، وعان قۇرىلىس الاڭىنا بارۋعا رۇقسات جوق. ءبولىم باسشىسىنىڭ جاۋابى ءوڭىر باسشىسىنىڭ ىزاسىن تۋدىردى.
نوعايەۆ نۇرسايا شاعىناۋدانىنداعى مەكتەپتىڭ، مونشا- ساۋىقتىرۋ كەشەنىنىڭ جانە 1200 ادامعا ارنالعان كونسەرت زالىنىڭ قۇرىلىس ورنىنا باردى. ولار دا قۇرىلىسى اياقتالماعان نىساندار تىزىمىنە ەنگەن. ساپار قورىتىندىسى بويىنشا، نۇرلان نوعايەۆ ءوزىنىڭ ورىنباسارى تيمۋر شاكىموۆكە ءار نىساندى جەكە قاداعالاۋ تۋرالى تاپسىرما بەردى.
