ا ق ش پەن ۇلى بريتانيا قازان ايىندا قىرعىزستاندا بولۋى مۇمكىن تەراكتىلەر جونىندە ەسكەرتتى
استانا. قازاقپارات - قىرعىزستانداعى ا ق ش پەن ۇلى بريتانيا ەلشىلىكتەرى ءوز ازاماتتارىنا قازان ايىنداعى ەل بيلىگى مەن شەتەلدىك ديپلوماتتارعا قارسى لاڭكەستىك اكتىلەردىڭ جوعارى قاۋپى جونىندە حابارلاپ، ولار ادام ۇرلاۋمەن جانە كەپىلگە الۋمەن بايلانىستى بولۋى مۇمكىندىگىن ەسكەرتتى.
بۇل تۋرالى ديپلوماتيالىق وكىلدىكتەردىڭ رەسمي سايتتارىندا جاريالاندى، دەپ حابارلايدى قازاقپارات.
30 - تامىز كۇنى تاڭەرتەڭ جانكەشتى- لاڭكەس بىشكەكتەگى قىتاي ەلشىلىگىنىڭ قاقپاسىن بۇزىپ كىرىپ، كولىككە ورناتىلعان جويقىن جارىلعىش قۇرىلعىسىن ىسكە قوستى. ەلشىلىكتىڭ ءۇش قىزمەتكەرى جاراقات الدى، ديپلوماتيالىق قىزمەتكەرلەر زارداپ شەككەن جوق، لاڭكەس وقيعا ورنىندا كوز جۇمدى. ەلشىلىك عيماراتتارى مەن قۇرىلىسىنا ەلەۋلى زاقىم كەلدى.
«ءبىز قازان ايىندا قىرعىزستاندا لاڭكەستىك اكتىنىڭ جوعارى قاۋپى بولاتىنى تۋرالى حابارلاما الدىق. ولار قىرعىز بيلىگى مەن شەتەلدىك ديپلوماتتارعا قارسى ادام ۇرلاۋمەن جانە كەپىلگە الۋمەن بايلانىستى بولۋى مۇمكىن. بريتاندىق ازاماتتارعا تونگەن قاۋىپ تۋرالى ناقتى اقپارات بولماسا دا، سىزدەرگە قوعامدىق ورىنداردا مۇقيات بولۋعا، حالىق كوپ شوعىرلانعان جەرلەرگە بارماۋعا جانە جەرگىلىكتى بيلىكتىڭ قاۋىپسىزدىك ماسەلەلەرى بويىنشا نۇسقاۋلىقتارىنا زەر سالۋعا شاقىرامىز»، - دەپ حابارلاندى ۇلى بريتانيا ەلشىلىگىنىڭ سايتىندا.
«ر ي ا نوۆوستيدىڭ» حابارلاۋىنشا، ءدال وسىنداي اقپارات دەمالىس كۇندەرى ا ق ش ەلشىلىگى سايتىندا دا جاريالاندى.
