كەرري: سيرياداعى اۋە شابۋىلدارىن اسكەري قىلمىس رەتىندە تەكسەرۋ كەرەك
استانا. قازاقپارات - ماسكەۋ مەن داماسكىنىڭ سيريادا بەيبىت تۇرعىندار مەن ەمدەۋ مەكەمەلەرىنە جاساعان اۋە شابۋىلى اسكەري قىلمىس رەتىندە تەكسەرىلۋى قاجەت دەپ مالىمدەدى اق ش مەملەكەتتىك حاتشىسى دجون كەرري جۇما كۇنى ۆاشينگوندا فرانسيا سىرتقى ىستەر ءمينيسترى جان- مارك ەرومەن بىرگە وتكىزگەن باسپا ءسوز ءماسليحاتىندا.
ونىڭ ايتۋىنشا، جۇماعا قاراعان ءتۇنى سيريالىق اۋرۋحانالارعا بەرىلگەن كەزەكتى اۋە سوققىلارىنان 20 عا جۋىق ادام مەرت بولىپ، 100 شاقتىسى جارالانعان.
- رەسەي مەن [سيريالىق] رەجيم اۋرۋحانالار مەن مەديتسينالىق مەكەمەلەردى، بالالار مەن ايەلدەردى بومبالاۋدى نەلىكتەن جالعاستىرىپ جاتقانىن الەمگە تۇسىندىرۋمەن عانا شەكتەلمەۋى ءتيىس. بۇل ءىس- ارەكەتتەر اسكەري قىلمىسقا جاتا ما دەگەن تۇرعىدا مۇقيات تەكسەرۋدى قاجەت ەتەدى. جانە ونى جاساعاندار جاۋاپكەرشىلىگىن كوتەرەتىن بولادى. بۇل كەزدەيسوقتىققا جاتپايدى، - دەگەن كەرري.
رەسەي سىرتقى ىستەر مينيسترلىگىنىڭ رەسمي وكىلى ماريا زاحاروۆا ا ق ش مەملەكەتتىك حاتشىسىنىڭ مالىمدەمەسىن «پروپاگاندا» دەپ اتاعان.
«ازاتتىق»
