بالانى تاڭەرتەڭ قالاي وياتۋ كەرەك؟

استانا. قازاقپارات - جازعى دەمالىس اياقتالدى. الايدا تاڭەرتەڭ ەرتە تۇرۋ اتا- اناعا دا، بالالارعا دا وڭاي ەمەس.

اسىرەسە بالالارى بالاباقشاعا، مەكتەپكە العاش باراتىندار ءۇشىن اۋىر سىن. الەۋمەتتىك ساۋالناماعا سۇيەنسەك، بالالاردىڭ مەكتەپكە بارعىسى كەلمەۋىنىڭ باستى سەبەبى تاڭەرتەڭ ەرتە ويانا الماۋىنا بايلانىستى ەكەن. كەلەسى ەرەجەلەرگە نازار اۋدارساڭىز، بالانىڭ ەرتە ويانۋى ۇيرەنشىكتى، باستىسى كوڭىلدى داعدىعا اينالادى.

1-كەڭەس. اربانىڭ الدىڭعى دوڭعالاعى

بالا اتا- اناسىنىڭ ءىس- ارەكەتىن قايتالايدى. ولار ءۇشىن ءسىزدىڭ ايتقانىڭىز - زاڭ، ءىسىڭىز - ونەگە. ال زاڭ شىعارۋشى ورگان ۇيىقتاپ جاتسا، اتقارۋشى ورگانعا امال بار ما؟ اتا- اناسى ۇيىقتاپ جاتسا، بالاعا دۇنيە دە مۇلگىپ تۇرعانداي كورىنەدى. سوندىقتان ەڭ الدىمەن وزىڭىزدەن باستاڭىز.

2-كەڭەس. كەشكى دايىندىق

بالاعا ءوز ۋاقىتىن جوسپارلاۋدى ۇيرەتىڭىز. تەك اۋىزشا عانا ايتۋ ەمەس، ءىس جۇزىندە دە دايىندالۋى ءتيىس. جاتار الدىندا ەرتەڭ كيەتىن كيىمدى، وقۋلىق- داپتەرلەرىن سومكەسىنە سالۋ، الاتىن زاتتارىن دايىنداۋ ادەتكە اينالسىن.

3-كەڭەس. ءوز ريتۋالدارىڭىزدى قالىپتاستىرىڭىز.

كۇندەلىكتى ءبىر ۋاقىتتا، ءبىر سارىندا ءبىر ءىستى قايتالاعان ءجون: وياندى، جۋىندى، جاتتىعۋ جاسادى، تاڭعى اس ءىشتى جانە ت. ب. تىزبەك ۇزىلمەۋى ءتيىس. ارينە، ديكتاتۋراعا ۇقساۋى مۇمكىن، ءبىراق بالا وسىلاي ءوزىن ءوزى تارتىپكە كەلتىرۋدى، جۇمىسىن ۇيىمداستىرۋدى ۇيرەنەدى. جينالىسقا كەشىگىپ، جولاي كيىنىپ، ءومىرى اسىعىپ- ۇسىگىپ جۇرەتىن ارىپتەسىڭىز بار عوي؟ بالاڭىز ەرجەتكەندە سونداي بولماسىن دەسەڭىز، قازىردەن باستاڭىز.

4-كەڭەس. كۇن قايىرلى بولۋى ءۇشىن تاڭ كوڭىلدى باستالسىن

بالاڭىزبەن ويىن ويلاستىرىڭىز. مۇمكىن ونى سۇيىكتى ويىنشىعى، بەت ورامالى نە كيەتىن كيىمى وياتار. وياتۋ پروتسەسسىن ساحنالىق قويىلىمعا اينالدىرۋعا بولادى. مىسالى، باس ءۋازىرى «ترانسفورمەر» ونىڭ تۇندە كورگەن ءتۇسىن جورىپ بەرۋگە دايىن ەكەنىن ايتىڭىز. باستىسى قويىلىمدار ءبىر سارىندى بولماۋى ءتيىس.

5-كەڭەس. ءوز بەتىمەن ويانۋعا مۇمكىندىك بەرىڭىز.

بالا «تۇرا عوي، كەشىگىپ قالاسىڭ» دەپ جۇلقىلاعاننان ەمەس، ءوزى ويانعانى ءجون. بالكىم ساعاتىنداعى نەمەسە تەلەفونداعى وياتقىش قوڭىراۋىنان ويانار، الدە ءسىزدىڭ اسۇيدەگى قۋىرىلعان ءبالىش نەمەسە كوفە يىسىنەن ويانار. ايتپاقشى، دۇكەننىڭ ءتاتتى ءبالىش، پەچەنە، شوكولادتى كەكستەرىن ميكروتولقىندى پەشكە سالىپ قىزدىرعاندا تاماشا ءيىس شىعادى. مامالارى دايىنداعان باۋىرساق، توقاشتارىنىڭ حوش يىسىنەن ويانعاندار بىلەدى، قايىرلى تاڭ ءدال وسىلاي اتادى.