ۇزىناعاشتاعى قاندى قىلمىسقا قاتىسى بار كۇدىكتىنىڭ اناسى سۇحبات بەردى

تالدىقورعان. قازاقپارات - الماتى وبلىسىندا ءدۇيىم جۇرتتى شۋلاتىپ، ءۇش بىردەي ازاماتتى جاۋىزدىقپەن ءولتىردى دەگەن كۇدىكتىنىڭ اناسى قازاقپارات تىلشىسىنە سۇحبات بەردى.

جامبىل اۋدانىنىڭ تۇرعىنى، كۇدىكتى مۇرات وڭالبايەۆتىڭ اناسى ۇلىنىڭ اتالعان قاندى قىلمىسقا قاتىسى بار دەگەنگە مۇلدەم سەنبەيدى. قايعىدان قان جۇتقان انا، ۇلى مۇرات الدەبىرەۋدىڭ ارباۋىنا ءتۇستى، دەپ كۇدىكتەنەدى. اناسىنىڭ سوزىنشە، ۇلى مۇراتقا اۋىلدىڭ تانىسى قوڭىراۋ شالىپ، بازاردان العان مالىن ءتۇسىرىسىپ جىبەرشى دەپ كومەك سۇراعان. مۇرات بىردەن سول قوڭىراۋ شالعان ادامعا كەتكەن. ءبىراق، اناسى كىمنىڭ قوڭىراۋ شالعانىن بىلمەيمىن دەيدى.

«تەك ادام ولتىرەدى دەگەنگە مۇلدەم سەنبەيمىن. التىن كورسە پەرىشتە جولدان تايادى دەيدى، بالكىم ساعان بىردەمە بەرەمىز دەپ، سوعان ىلەسىپ كەتتى مە، بىلمەيمىن. قايدان بىلەيىن، ول تەك ەرۋشى»، دەيدى مۇراتتىڭ اناسى.

مۇرات وڭالبايەۆ بۇعان دەيىن كولىگىمەن ادام تاسىپ كۇنەلتكەن ەكەن. ءۇش بالانىڭ اكەسى. ءۇشىنشى توپتاعى مۇگەدەك ەكەن. ءبىر كوزى كەمتار. بۇعان دەيىن قىلمىستىق جاۋاپقا تارتىلماعان. ال ءۇش ازاماتتى جاۋىزدىقپەن ءولتىردى دەگەن قاندى قىلمىسقا قاتىسى بار دەپ ۇستالعان تالعات سۇلەيمەنوۆتىڭ دە ءۇش بالاسى بار ەكەن.

جالپى مال باققان شارۋالار مەن مال ساتقان ساۋداگەرلەرگە بازاردا بۇعان دەيىن دە بىرنەشە مارتە شابۋىل جاسالعانى ايتىلىپ جاتىر. ماسەلەن، ەسبولات ماعاز ەسىمدى ساۋداگەر ءوزىنىڭ 4 ميلليون تەڭگە اقشاسىنان بىرەر مينۋتتاردىڭ ىشىندە ايرىلىپ قالعانىن ايتادى. ءبىراق پوليتسياعا ارىزدانعانىمەن ناتيجە جوق.

سامال قابىشەۆا