مايكل دجەكسوننىڭ حيت اندەرىنىڭ اۆتورى ومىردەن وزدى

استانا. قازاقپارات - مايكل دجەكسوننىڭ Thriller، Off The Wall سىندى حيت اندەرىنىڭ اۆتورى، بريتاندىق كومپوزيتور رود تەمپەرتون 66 جاسىندا ومىردەن وزدى.

Warner/Chappell مۋزىكالىق باسىلىمىنىڭ ديرەكتورى دجون پلاتتىڭ ايتۋىنشا، تەمپەرتون قاتەرلى ىسىك اۋرۋىنان كوز جۇمعان، دەپ حابارلادى BBC News.

كومپوزيتور شامامەن ءبىر اپتا بۇرىن باقيلىققا اتتانعان بولۋى مۇمكىن. ازىرگە قايعىلى جاعدايدىڭ ناقتى قاشان بولعانى بەلگىسىز. ەلگە حابارلانباستان، سازگەردىڭ جەرلەۋ ءراسىمى دە وتكىزىلىپ قويعان.

 

سۋرەتتە: تەمپەرتون جۇبايىمەن بىرگە، 2012 -جىل

 ايتا كەتەيىك، 1982 -جىل جارىققا شىققان Thriller ءانى كومپوزيتوردىڭ ەڭ تانىمال تۋىندىسىنا اينالدى. تەمپەرتون مايكل دجەكسونعا ونعا جۋىق ءان جازىپ بەرگەن. ولاردىڭ قاتارىندا Burn This Disco Out, Baby Be Mine جانە The Lady in My Life اندەرى بار. ودان بولەك، تەمپەرتون Give Me The Night, Sweet Freedom, Always Forever and Boogie Nights اندەرىنىڭ اۆتورى بولىپ تابىلادى.