بەرىك ءابدىعالي ۇلى: ەندى كەنەسارىنىڭ باس سۇيەگىن قايتارۋ كەرەك
بۇل تۋرالى استاناداعى حالىقارالىق اۋەجايىدا باتىر بابانىڭ باس سۇيەگىن قارسى الۋعا كەلگەن ساياساتتانۋشى، قوعام قايراتكەرى بەرىك ءابدىعالي ۇلى ءمالىم ەتتى، دەپ حابارلايدى قازاقپارات.
«كەيكى باتىردىڭ باس سۇيەگى ەلگە جەتكىزىلدى، ەندىگى كەزەك كەنەسارى حاننىڭ باس سۇيەگىن الىپ كەلۋدە تۇر. كوپ جىلدان بەرى قازاقستاننان عالىمدار ىزدەستىرۋ جۇمىستارىن ۇزبەي جۇرگىزىپ كەلەدى. ازىرگە تابىلماي جاتىر. وسى رەتتە رەسەيدىڭ عالىمدارى قوسىلىپ، تاۋىپ بەرسە جاقسى بولار ەدى. ويتكەنى، ولاردىڭ عالىمدارىندا كوپتەگەن قۇجاتتاردى تەكسەرىپ شىعۋعا مۇمكىندىكتەرى بار» ، - دەدى قوعام قايراتكەرى.
سونىمەن قاتار ول قىرعىزستان جەرىندە دە ءتيىستى زەرتتەۋ جۇمىستارىن جۇرگىزۋ ماڭىزدى ەكەنىن جەتكىزدى.
«حاننىڭ باسىن تاپپاساق تا، كەنەسارىنىڭ قازا بولعان جەرى بەلگىلى عوي. قىرعىزستان جەرىندە زەرتتەۋ جۇمىستارىن تەرەڭدەتىپ، ساراپتامالىق جۇمىستار جۇرگىزۋگە بولادى. سوندىقتان ىزدەۋدى توقتاتپاۋ كەرەك. سەبەبى، بۇل قازىرگى بۋىننىڭ پارىزى دەپ بىلەمىن» ، - دەدى ءابدىعالي ۇلى.
ونىڭ سوزىنە قاراعاندا، وسىدان 10 جىل بۇرىن عىلىمي جۇمىستار ارقىلى سانكت- پەتەربورداعى انتروپولوگيالىق قوردىڭ كۋنستكامەراسىنا بارىپ، كەيكى باتىردىڭ باس سۇيەگىن سۇراعان ەكەن. سول كەزدە مۋزەي باسشىلىعى باس سۇيەكتى بەرمەيتىندىگىن حابارلاعان كورىنەدى.
«ولار وزدەرىنىڭ جاۋابىندا باس سۇيەك رەسەي ۇكىمەتىنىڭ مەنشىگىندە تۇرعاندىعىن، بۇدان باسقا كۋنستكامەرادا كاۆكازدان جانە باسقا دا ەلدەردەن كوپتەگەن ادامداردىڭ باسى ساقتاۋلى ەكەنىن، ەگەر باسسۇيەكتى رەسەي تاراپى قازاقستانعا بەرسە، قالعان ەلدەر جاپپاي سۇراۋ جولدايتىنىن ايتقان بولاتىن. بۇل تۇرعىدا مۋزەي باسشىلىعى ۇكىمەت قاۋلىسى شىققان جاعدايدا عانا بىزگە تابىستاي الاتىنىن حابارلادى» ، - دەپ ناقتىلادى قوعام قايراتكەرى.
اۆتور: رۋسلان عابباسوۆ
