شەنەۋنىكتەر كەيدە بيزنەسكە اقىلعا سىيمايتىن تالاپتار قويادى - باس پروكۋراتۋرا

استانا. قازاقپارات - باس پروكۋراتۋرا كەيدە شەنەۋنىكتەر تاراپىنان بيزنەسكە قيسىنعا كەلمەيتىن تالاپتار قويادى دەپ ەسەپتەيدى. بۇل ءوز كەزەگىندە كاسىپكەرلىككە ۇلكەن كەدەرگىلەر كەلتىرىپ جاتىر.

 بۇل تۋرالى ق ر باس پروكۋراتۋراسىنىڭ القا ماجىلىسىندە باس پروكۋروردىڭ ورىنباسارى مارات احمەتجانوۆ ءمالىم ەتتى، دەپ حابارلايدى «قازاقپارات».

 مىسال رەتىندە، مارات احمەتجانوۆ تارازدا ورىن العان وقيعانى كەلتىردى. وندا اۋىل شارۋاشىلىعى تەحنيكاسىنا قاجەتتى قۇجاتتاردى الۋ ءۇشىن شەنەۋنىكتەر كاسىپكەردەن اسكەري كوميسسارياتتان انىقتاما اكەلۋىن تالاپ ەتكەن.

«سوڭعى ءۇش جىلدا رۇقسات قۇجاتتارى ءۇش ەسەگە دەيىن قىسقاردى. دەگەنمەن، قازىرگى ۋاقىتقا دەيىن مەملەكەتتىك ورگاندار مەملەكەتتىك قىزمەت ۇسىنۋ مەرزىمىن بۇزىپ كەلەدى، كاسىپكەرلەرگە نەگىزسىز رۇقسات بەرۋدەن باس تارتادى. بيزنەسكە قاجەت ەمەس قۇجاتتار سۇراتادى. مىسالى، تارازدا شەنەۋنىكتەر اۋىل شارۋاشىلىعى تەحنيكالارىنا تەحنيكالىق پاسپورتتى بەرۋ ءۇشىن 700 كاسىپكەردەن اسكەري كوميسسارياتتان انىقتاما سۇراتقان. پروكۋراتۋرا ۇسىنىسىمەن ەكى باسشى جازالاندى»، - دەپ اتاپ ءوتتى ول.

پروكۋروردىڭ ايتۋىنشا، اقىلعا سىيمايتىن تالاپتار مۇنىمەن شەكتەلمەيدى.

«كەيبىر تالاپتار ءتىپتى قيسىنعا كەلمەيدى. مىسالى، قوعامدىق تاماقتانۋ ورىندارىنا سانيتارلىق ەرەجە بويىنشا سالقىن تاعامداردى دايىندايتىن بولمە تەك سولتۇستىك- باتىس بولىكتە ورنالاسۋى كەرەك. تورتتاردى كەسىلگەن كۇيدە ساتۋعا بولمايدى دەگەن وعاش تالاپقا نە ايتامىز؟ بيزنەسكە قانداي تالاپتار كەدەرگى كەلتىرەتىندىگىن انىقتاۋ ءۇشىن باس پروكۋراتۋرا مەن «اتامەكەن» ۇ ك پ سايتىندا ارنايى فورمۋليار ەنگىزىلدى. دەگەنمەن وعان تەك 15 ءوتىنىش تۇسكەن. بۇل بيزنەستىڭ بىزگە دەگەن سەنىمى ءالى تومەن دەگەن ءسوز. اكىمشىلىك كەدەرگىلەر، ءجون- جوسىقسىز نورمالار باردا، كاسىپكەر ءاردايىم كىنالى بولىپ قالا بەرمەك، سەبەبى زاڭ شەنەۋنىكتىڭ جاعىندا بولادى»، - دەپ اتاپ ءوتتى مارات احمەتجانوۆ.

اۆتور: جاسۇلان جولدىبايەۆ