ادۆوكات ۇزىناعاشتاعى قاندى وقيعانىڭ ءمان- جايىن ايتىپ بەردى
ايتا كەتەيىك، جامبىل وبلىسىندا سۇرانشى باتىر اۋىلىنىڭ 44 جانە 41 جاستاعى تۇرعىندارى ءۇش ەر ادامدى - جارقىنبەك دولداندى، مۇقيات زارىلحاندى جانە ءالىمحان قادىلبەكتى ءولتىردى دەگەن كۇدىكپەن ۇستالعان بولاتىن.
ادۆوكات مەركەبەك ماكەنبايەۆتىڭ ايتۋىنشا، ونىڭ قورعالۋشىلارى وسىعان دەيىن سوتتى بولماعان. «ولاردىڭ وتباسىلارى بار. ءارقايسىسىندا جەكە جەر ءۇي مەن مالى بار. سۇلەيمانوۆتىڭ ءۇش ۇلى بار - كەنجە ۇلى ءۇش جاستا. وڭالبايەۆتىڭ دا ءۇش ۇلى بار. ولار ۇزىناعاشتان 25 شاقىرىم جەردەگى اۋىلدا تۇرادى»، - دەدى ادۆوكات.
سونىمەن قاتار، ادۆوكاتتىڭ ايتۋىنشا، قايتىس بولعان اعايىندىلار مەن كۇدىكتىلەر تانىس بولماعان. كۇدىكتىلەردەن الىنعان جاۋاپ بويىنشا، وقيعانىڭ حرونولوگياسى بىلاي وربىگەن:
«17 - قىركۇيەكتە سۇلەيمانوۆ ۇزىناعاشتاعى مال بازارىنا بارادى. ول مال شارۋاشىلىعىمەن اينالىسادى. سەنبىدەن جەكسەنبىگە قاراعان ءتۇنى بازاردا ادەتتە ادامدار كوپتەر جينالادى: بىرەۋ مال اكەلەدى، ەكىنشىسى ورىن الىپ قويادى. وسىلايشا مەنىڭ قورعالۋشىم دا سول كۇنى بازارعا كەلىپ، ءوزىنىڭ 2-3 بۇزاۋىن ساتادى. كەيىننەن سۇلەيمانوۆ ەكى كاماز- بەن مال اكەلگەن اعايىندىلاردى كورىپ، ولارمەن ساۋدالاسا باستايدى. سۇلەيمانوۆ 16 باس سيىر ساتىپ الادى»، - دەپ باياندادى ادۆوكات.
الىنعان تاۋار ءۇشىن كۇدىكتى سۇلەيمانوۆ ساتۋشىلارعا 2 ميلليون 240 مىڭ تەڭگە بەرەدى. سودان كۇدىكتىلەر اعايىندىلاردىڭ كامازىمەن مالداردى سۇرانشى باتىر اۋىلىنا اپارادى. جولدا سۇلەيمانوۆ ءوزىنىڭ اۋىلداسى وڭالبايەۆقا حابارلاسىپ، ودان مالداردى كولىكتەن شىعارۋعا كومەكتەسۋىن سۇرايدى. 28 - قىركۇيەكتە شامامەن ساعات 13.00-دە ولار سۇلەيمانوۆتىڭ ۇيىنە كەلىپ، مالداردى سوندا قالدىرادى. ايتا كەتەيىك، ولار اعايىندىلاردىڭ 36 مالىن ساتىپ الامىز دەپ كەلىسكەن ەكەن.
«سودان سۇلەيمانوۆ ولاردى الداپ، 20 مالدى ونىڭ تاۋ جاقتا تۇراتىن تۋىسى العىسى كەلەتىنىن ايتادى. سوندا قالعان اقشانى بەرەمىز دەپ كەلىسكەن. ولار ورالماندارعا تاعى ەكى ميلليون 800 مىڭ تەڭگە تولەۋ كەرەك بولاتىن. وسىلايشا مال ساتۋشىلار كەلىسىپ، مەنىڭ قورعالۋشىم وزىمەن بىرگە ۆينچەستەر الىپ شىعادى. اعايىنداردىڭ "نەلىكتەن قارۋ الىپ شىقتىڭ؟ " دەگەن سۇراعىنا سۇلەيمانوۆ وندا قاسقىرلار كوپ دەپ، قارۋدى قويشىلارعا اپارىپ بەرەتىنىن ايتقان»، - دەدى مەركەبەك ماكەنبايەۆ.
تاۋعا بارۋعا كەلىسكەن ءۇش اعايىندى مەن كۇدىكتىلەر وسىلايشا جولعا شىعادى. ولاردىڭ سوڭىنان سۇر ءتۇستى Mercedes كولىگىن جۇرگىزىپ كەلە جاتقان وڭالبايەۆ كەلەدى. تاۋداعى قوراعا جاقىنداعان بويدا ولار سۋلى ساي شاتقالىنىڭ الدىنا بارىپ توقتايدى. سودان مالشىلار كامازدان 12 مالدى تۇسىرەدى.
«شاتقالعا جەتكەندە سۇلەيمانوۆ قاسىنداعى ەر ادامنىڭ ارقاسىنا وق اتادى. الايدا ول قۇلامايدى. سودان مەنىڭ قورعالۋشىم ەكىنشى رەت تاعى وق اتادى. سودان ەر ادامنىڭ ءمايىتىن الىپ، ءشوپتىڭ اراسىنا تىعىپ، ارى قاراي كەتە بەرەدى. سول جاقتا سۇلەيمانوۆ اعاسىنىڭ مال قوراسىندا قالعانىن ايتادى. شاتقالدا تالعات سۇلەيمانوۆ ەكىنشى ەر ادامدى اتىپ ولتىرەدى. وسىنى كورگەن مۇرات وعان باس سالىپ، وسى قىلمىس ءۇشىن قاماۋعا الىناتىندارىن ايتقان. ال تالعات بولسا ونىڭ بۇل ايقايىنا "ەگەر سەن ماعان قازىر كومەكتەسپەسەڭ، سەنى دە ولتىرەمىن" دەپ جاۋاپ قايتارعان"، - دەدى ادۆوكات.
سۇلەيمانوۆ مۇراتتى قورقىتىپ، وعان ءۇشىنشى ەر ادامدى شاي ىشۋگە شاقىرۋىن بۇيىرادى. سودان مۇرات ءۇشىنشى ەر ادام جاققا قاراي بەت بۇرعان بولىپ، جولدا جاسىرىنىپ قالادى. بىرنەشە ۋاقىت وتكەن سوڭ سۇلەيمانوۆتىڭ ءوزى سول جاققا قاراي بارىپ، تابيعاتتى تاماشالاپ جۇرگەن ءۇشىنشى ەر ادامدى كورەدى.
"300 مەتر بيىكتىكتە تۇرىپ، ۆينتوۆكامەن ءۇشىنشى ەر ادامنىڭ باسىنا وق اتادى. سودان مۇراتتى تاۋىپ الىپ، ونى كومەكتەسۋگە ماجبۇرلەيدى. ءسويتىپ ەكەۋى مايىتتەردى كامازعا سالادى. مۇردەلەردى كامازدىڭ ىشىندەگى تەزەكتەرمەن جاۋىپ تاستايدى. كەيىن جولعا شىعادى. الايدا جۇك كولىگى جولدا بۇزىلىپ قالادى. سودان ولار كامازدى سول جاقتا تاستاپ، ۇيلەرىنە قايتا بەرەدى. مۇنىڭ بارلىعىن سۇلەيمانوۆتىڭ ءوزى ايتىپ بەردى. كىناسىن تولىقتاي مويىندادى. اعايىندىلاردى ولتىرگەن سوڭ قاتتى قينالعانىن جانە دۇيسەنبىدە ءوزى كەلىپ، كىناسىن مويىنداماقشى بولعانىن دا ايتتى. سونداي- اق، ول ءۇش ەر ادامدى 20 مالدى تارتىپ الۋ ءۇشىن ولتىرگەنىن ايتتى"، - دەدى ادۆوكات. سونىمەن قاتار، ادۆوكات كۇدىكتىلەردىڭ بۇل قىلمىستى الدىن الا ويلاستىرماعانىن مالىمدەدى.
بۇعان دەيىن حابارلاعانىمىزداي، 19 - قىركۇيەكتە الماتى وبلىسى جامبىل اۋدانىندا مال ساۋداسىمەن اينالىسىپ جۇرگەن ءۇش جىگىتتىڭ جوعالىپ كەتكەنى تۋرالى حابار كەلىپ ءتۇستى.
مارقۇمداردىڭ تۋىسقاندارىنىڭ ايتۋىنشا، دولدان ۇلى جارقىنبەك (1979 -جىلى تۋعان) ، زارلىحان ۇلى مۇقيات (1973 -جىلى تۋعان) ، ءالىمحان قادىلبەك شىعىس قازاقستان وبلىسىنىڭ تارباعاتاي اۋدانىنان ساتىپ العان 40 باس مالدى ەكى جۇك كولىگىمەن 17 - قىركۇيەك كۇنى ۇزىناعاش بازارىنا شىعارعان. 19 - قىركۇيەكتە سوڭعى رەت بايلانىسقا شىققان. بىرنەشە كۇننەن كەيىن ولاردىڭ دەنەسى تابىلدى. ولتىرىلگەن اعايىندىلاردى ءولىم الدىندا ايۋاندىقپەن قيناعانىن حابارلاعان بولاتىنبىز.
27 - قىركۇيەكتە ءۇش جىگىتتىڭ ءمايىتى جەر قويناۋىنا تاپسىرىلدى. ۇكىمەت باسشىسى باقىتجان ساعىنتايەۆ ىشكى ىستەر ءمينيسترى ق. قاسىموۆقا بۇل ىسكە قاتىستى تەرگەۋ بارىسىن جەكە باقىلاۋىنا الۋدى تاپسىردى.
