اسەل تاسماعامبەتوۆا الماتىدا جەكەمەنشىك ينستيتۋتىنىڭ جاڭا عيماراتىن سالادى - فوتو

استانا. قازاقپارات - الماتىدا ورتالىق ازيا ەكولوگيالىق زەرتتەۋلەر ينستيتۋتىنىڭ جاڭا عيماراتى پايدا بولادى. جاڭا نىساننىڭ جوباسىن الماتى قالالىق قۇرىلىس كەڭەسى قاراپ، بەكىتكەن.

ينستيتۋتتىڭ زاماناۋي جاڭا عيماراتى دوستىق داڭعىلىنىڭ جوعارعى جاعىندا ورنالاسپاق. ال، قازىر ينستيتۋت «دوستىق داڭعىلى، 250» مەكەنجايىندا ورنالاسقان، دەپ حابارلايدى «قازاقپارات».

 بۇل ينستيتۋت قورشاعان ورتانى قورعاۋ سالاسىندا قىزمەت كورسەتىپ، جۇمىس ىستەي الاتىندىعى تۋرالى ليسەنزيانى 2012 -جىلى 16 - قازاندا قورشاعان ورتانى قورعاۋ مينيسترلىگىنەن العان. ياعني، رەسمي تۇردە 2012 -جىلى تىركەلگەن. «ورتالىق ازيا ەكولوگيالىق زەرتتەۋلەر ينستيتۋتى» ج ش س- نىڭ قۇرىلتايشىسى - ق ر پرەمر- ءمينيسترىنىڭ ورىنباسارى يمانعالي تاسماعامبەتوۆتىڭ ۇلكەن قىزى - اسەل تاسماعامبەتوۆا. ينستيتۋتتىڭ قازىر بەس زەرتحاناسى بار.

 «قازاقستان الەمدەگى ونەركاسىبى دامىپ كەلە جاتقان ەلدەردىڭ ءبىرى. بىزدەگى كاسىپورىنداردىڭ كوبى مۇناي، مەتال، تاعام، مەديتسينا سالالارىندا جۇمىس ىستەيدى. تاۋەلسىزدىك العاننان كەيىن ت م د- نىڭ وزگە ەلدەرى سياقتى قازاقستان دا قورشاعان ورتانى قورعاۋ ماسەلەلەرى جونىندەگى حالىقارالىق قۇجاتتارعا قوسىلىپ، حالىقارالىق قاۋىمداستىق الدىندا قورشاعان ورتانى قورعاۋ مىندەتىن يەلەندى. ءبىزدىڭ ينستيتۋتتىڭ قىزمەتى ونەركاسىپتىك كۇشتەردىڭ ەكولوگيالىق- ەكونوميكالىق تەپە- تەڭدىگىن ساقتاۋ، حالىقارالىق ىنتىماقتاستىق اياسىندا جۇمىس ىستەۋ ميسسيالارىن كوزدەيدى. ينستيتۋتتىڭ 6 دەپارتامەنتى، 7 باسقارماسى جانە 5 زەرتحاناسى بار»، - دەلىنگەن ينستيتۋتتىڭ سايتىنداعى اقپاراتتا.

جالپى، الماتى اكىمدىگىنىڭ باسپا ءسوز قىزمەتى حابارلاعانداي، ينستيتۋت جاڭا عيماراتىنىڭ قۇرىلىسىن ەنەرگيا ۇنەمدەيتىن تەحنولوگيالار مەن ەكولوگيالىق تازا قۇرىلىس ماتەريالدارىنان سالۋدى جوسپارلاپ وتىر ەكەن.

اۆتور: كەنجەكەي توقتامۇرات قىزى