كۇيەۋلەرى توقال الىپ كەتپەۋ ءۇشىن قازاق كەلىنشەكتەرى نە ىستەۋ كەرەك؟
التى بالانىڭ اناسى بۇگىندە ايەل زاتىنا قاتىستى ومىردەن كورگەن- تۇيگەندەرىن جەلىگە سالۋدى ادەتكە اينالدىرعان. ۇيدەگى وتاعاسى ىشكىلىككە سالىنباي، وزىنە توقال تاۋىپ، وتباسىن تاستاپ كەتپەسى ءۇشىن، جالپى، جانۇيانى ۇستاپ تۇرۋ ءۇشىن ايەلدىڭ قولىنان نە كەلەدى؟
وسى سۇراقتىڭ جاۋابىن NUR. KZ ءتىلشىسى قۇرالاي وشاقبايەۆادان سۇراپ كوردى.
نەگە قۇرالاي ءوزىن «حانىم» دەپ اتايدى؟
ءوزىن جەلىدە "حانىم" اتالۋىنىڭ سەبەبىن تۇسىندىرگەن قۇرالاي: «حانىمنىڭ ايتقانى ەكى ەتىلمەيدى، بارلىق تىلەگى ورىندالادى، سوندىقتان مەن كۇيەۋىمدى حان كورەم دە، ونىڭ الدىندا ءوزىمدى حانىمداي سەزىنەمىن» ، - دەيدى.
قاراپايىم تىلمەن ايەل تاعدىرىنا قاتىستى اڭگىمە قوزعايتىن بلوگەر جەلىدەگى جازبالارىن اۋىلداعى ايەلدەرگە ارنايدى ەكەن.
«مەن شالعايداعى نازىك جاندى قىز- كەلىنشەكتەرگە ارناپ جازامىن، قالانىڭ ايەلدەرى وتباسىندا قالاي ءجۇرىپ- تۇرۋدى مەنسىز دە تاۋىپ الادى عالامتوردان، ولارعا قۇرالاي حانىمنىڭ ەشقانداي اقىلىنىڭ كەرەگى جوق» ، - دەيدى بلوگەر اعىنان جارىلىپ.
بىرەۋىنىڭ كۇيەۋى ىشەدى، ەندى ءبىرى ناشاقور، باسقا ايەل تاۋىپ العاندارى دا بار. كۇيەۋىنەن تاياق جەپ جۇرگەن كەلىنشەكتەر قانشاما؟ نە دۇرىس ەمەس؟ قاي جەردە قاتەلىك كەتتى جانە ول كىمنىڭ قاتەسى؟
قۇرالاي حانىم قازاقستاندىق قىز- كەلىنشەكتەردىڭ باستى قاتەلىكتەرىن اتاپ بەردى
قۇرالاي حانىمنىڭ ايتۋىنشا، ءبىرىنشى قاتەلىك - كۇيەۋگە شىققان سوڭ قىز- كەلىنشەكتەر بوساڭسىپ كەتەدى. قىز كەزىندە وزىنە كوڭىل ءبولىپ، وقيدى- توقيدى، دامۋعا ۇمتىلادى. ال سودان سوڭ، ءوزىن ۇمىتادى، تاستاپ جىبەرەدى تۇڭعيىققا. سىمباتىنا، كوركىنە كوڭىل بولمەيدى. وقۋىن ءبىتىرىپ تۇرمىسقا شىققان جاس قىز سول دەڭگەيدە قالىپ قويادى.
ال ەرى جۇمىس ىستەيدى، كوپشىلىكتىڭ ورتاسىندا جۇرەدى، كورگەن- بىلگەنى كوبەيەدى، وسەدى. ءسويتىپ جۇبايلاردىڭ ورتاسىندا ورتاق اڭگىمە ازايىپ، ۇلكەن الشاقتىق پايدا بولادى. سوندىقتان، ايەل ادام ۇيدە وتىرىپ- اق، اعىلشىن ءتىلىن ۇيرەنسىن، سەمينارلارعا قاتىسسىن، ءتىپتى جاڭا حوببي تاپسىن. ارتىق سالماق بولسا، ونىمەن كۇرەسسىن. ايتەۋىر، ەرىنبەسىن.
ەكىنشى قاتەلىك، قازاقستاندىق كەلىنشەكتەر كۇيەۋىمەن باقىتتى ءومىر ءسۇرۋ ءۇشىن ەڭبەكتەنبەيدى. «كۇيەۋگە ءتيىپ الىپ، «بولدى ول - ولە- ولگەنشە مەنىكى» دەگەن تۇسىنىكپەن جۇرە بەرەدى. ول دۇرىس ەمەس. كەرىسىنشە، باسەكەگە قابىلەتتى جار بولۋ ءۇشىن جانىپ تۇرۋ كەرەك- ءتى. ەر ادامدار وزدەرىنە ايەلىنىڭ كوڭىل بولگەنىن قالايدى. سوندىقتان حانىمدار ۇيدەگى ەرىنە ەركەلەپ، ونىڭ ءاربىر تىندىرعان ىسىنە ريزا بولىپ، بولىمشى جەتىستىگىنە دە شىن قۋانا ءبىلۋى كەرەك. ەر اداممەن ساناسپاي، كەرىسىنشە، ونىڭ پىكىرىن سىيلاپ ۇيرەنۋى كەرەك» ، - دەيدى قۇرالاي وشاقبايەۆا.
قۇرالاي حانىمعا حات جازاتىن كىمدەر؟
قۇرالاي حانىمعا حات جازۋشى ايەلدەردىڭ دەنى - كۇيەۋى تاستاپ كەتكەن، اجىراسقان ايەلدەر ەكەن. ەكىنشى ورىندا ەنەسىمەن سىيىسپاي جۇرگەن كەلىنشەكتەر جايعاسىپتى. ولاردىڭ ءارقايسىسىنا بلوگەر شاماسىنا قاراي جاۋاپ بەرۋگە تىرىسقان.
«ەنەسىمەن ءتىل تابىسا الماي جۇرگەن كەلىنشەكتەرگە ەنەڭمەن جاقىنداسۋ ءۇشىن ول كىسىنىڭ الدىندا يىلە سال، كەرەك بولسا اياعىنىڭ تىرناعىن الىپ بەر دەيمىن. اللا ەرتە مە كەش پە يىلمەيمىن دەگەن كىسىنىڭ الدىندا ءيدىرىپ قويادى باسىمىزدى. بالكىم ەنەڭ توسەك تارتىپ جاتىپ قالعاندا استىن تازالارسىڭ، سوندىقتان وسى جاس كۇنىڭدە جاي تىرناعىن الىپ بەرىپ، يىلە سالعان دۇرىس. ادامنىڭ ەڭ ءالسىز تۇسى تابانى، تاباندا دەنەدەگى بار جۇيكە تالشىقتارىنىڭ نۇكتەلەرى شوعىرلانعان. ادامنىڭ اياعى جالاڭاشتانعاندا، ونىڭ جانى مەن ءتانى دە جالاڭاش سياقتى سەزىمدە بولادى. سونى قارىم- قاتىناستى جاقسارتۋ ءۇشىن پايدالانا ءبىلۋ كەرەك» ، - دەيدى قۇرالاي وشاقبايەۆا.
كۇيەۋى توقال الىپ وتباسىن تاستاپ كەتكەن كەلىنشەكتەر قۇرالاي حانىمنىڭ جەلىدەگى پاراقشاسىنا ءجيى مۇڭدارىن شاعاتىن كورىنەدى. بلوگەر بارلىق بالە جامان ويدان دەپ وتىر.
كۇيەۋ قاي كەزدە ايەلى مەن بالا- شاعاسىن تاستاپ كەتەدى؟
قۇرالاي وشاقبايەۆا ەركەكتە «وتباسىمدى تاستايمىن» دەگەن وي بولمايتىنىن ايتادى. جامان وي ءبىرىنشى ايەلدىڭ باسىنا كەلەدى، ال ەركەك ونى ىسپەن دالەلدەيدى ەكەن.
«وسى جىگىت مەنىڭ تەڭىم ەمەس. بەكەر شىقتىم وسىعان كۇيەۋگە. نەگە قۇداي ماعان وسىنداي (بيشارا، وڭباعان) كۇيەۋ بەرگەن؟ " - دەپ ويلاپ، ساناڭدا باياعىدا جۇرگەن جىگىتتى ونىمەن سالىستىرىپ جۇرسەڭ، سول كۇنى كۇيەۋىڭ باسقا بىرەۋگە كەتۋگە دايىندالادى. سەن ويشا قىدىرساڭ، ول ىسپەن دالەلدەپ بەرەدى. ول قىدىرام دەپ باسىندا ويلامايدى» ، - دەپ سەندىردى بلوگەر.
بۇگىندە قۇرالاي حانىم التى بالانى دۇنيەگە اكەلىپ، جارىمەن تاتۋ- ءتاتتى ءومىر ءسۇرىپ وتىرعان ۇلگىلى انا، اسىل جار.
