ورالدا اقساقالدار جاستارعا «ىرىس الدى - ىنتىماقتى» اماناتتادى - فوتو
«قوعامدىق كەلىسىم» كوممۋنالدىق مەملەكەتتىك مەكەمەسىنىڭ ديرەكتورى الەكساندر اجىعالييەۆتىڭ ايتۋىنشا، اتالعان شارا ەل تاۋەلسىزدىگىنىڭ 25 جىلدىعى اياسىندا وتكەندى تارازىلاپ، كەلەشەكتى باعدارلاپ، وي- پىكىر الماسۋ باعىتىندا ۇيىمداستىرىلدى. بۇل رەتتە اعا بۋىن وكىلدەرىنىڭ اقىل- كەڭەسى جاستار ءۇشىن ەرەكشە قۇندى. ازاتتىق ءۇشىن الىسىپ، جان بەرگەن، تاۋەلسىز قازاق ەلىنىڭ ىرگەسىن بەكىتىپ، كەرەگەسىن كەڭەيتۋ جولىندا تىنباي ەڭبەك ەتكەن اتا- بابالارىمىز بەن اعا ۇرپاقتىڭ ۇلگىسى ەشقاشان وشپەك ەمەس.
قازاقستان حالقى ب ق و اسسامبلەياسى اقساقالدار القاسىنىڭ ءتوراعاسى، وڭىردە باسشىلىق قىزمەتتەر اتقارعان ءارى تاريحشى راحمەتوللا سۇيەربايەۆتىڭ اتاپ وتكەنىندەي، ومىرلىك تاجىريبەسى باي، ەرلىگى مەن ەڭبەگى قاتار ورىلگەن ارداگەرلەر جاستارمەن ۇدايى كەزدەسىپ تۇرادى. ء«بىز ۇلى وتان سوعىسى كەزىندەگى اۋىرتپالىقتى، ودان كەيىنگى قيىنشىلىقتاردىڭ ءبارىن باستان كەشىردىك. سوندا دا ءبىلىم الىپ، كوزدەگەن ماقساتتارىمىزعا قول جەتكىزە بىلدىك. ەڭ باستىسى، اعا بۋىن وكىلدەرى وتانعا، حالقىنا ادال بولدى، ادىلدىك پەن ءتارتىپتى تۋ ەتتى. وكىنىشكە قاراي، حالقىمىزدىڭ ⅩⅩ عاسىرداعى وتكەن جولدارى، اشتىق، سوعىس، ساياسي قۋعىن- سۇرگىن سىندى ناۋبەتتەر تولىق اشىلىپ، جازىلىپ بولعان جوق. سوندىقتان جاس ۇرپاق سول كەزەڭنىڭ كوزى ءتىرى كۋاگەرلەرىنەن تاريح جىلناماسىنا قاجەتتى دەرەكتەردى الىپ قالۋى كەرەك»، - دەدى ر. سۇيەربايەۆ.
سوعىس جانە پروكۋراتۋرا ارداگەرى، ماسكەۋدەگى 1945 -جىلعى جەڭىس شەرۋىنە قاتىسقان يۆان گاپيچ مايدانگەرلەر قاتارىنىڭ كۇن ساناپ سەلدىرەپ بارا جاتقاندىعىن جەتكىزدى. تاعى ءبىر مايدانگەر، قازاقستاننىڭ قۇرمەتتى قۇرىلىسشىسى حامزا سافين وتانىن ءسۇيىپ، ءوز ەلىنىڭ وركەندەۋىنە ۇلەس قوسۋ ءار ازاماتتىڭ بورىشى ەكەندىگىن اتاپ كورسەتتى. «ءبىز پاتريوتيزم تۋرالى كوپ ايتامىز. اڭگىمە تەك ناسيحاتتا عانا ەمەس، اڭگىمە ءار ادامنىڭ ءوز وتانىنا، ەلىنە ءومىرىن ارناپ، قالتقىسىز قىزمەت ەتە بىلۋىندە. قازاقستان ءبىزسىز ءومىر سۇرە الادى، ءبىراق ءبىز قازاق ەلىنسىز ءومىر سۇرە المايمىز. ۇلتىنا قاراماستان، ەلىمىزدە ءار ادامنىڭ ومىردەن ءوز ورنىن تابۋىنا بارلىق جاعداي جاسالىپ وتىر. ەلباسىمىز باستاعان سارا جولمەن ءجۇرىپ، بىرلىگىمىزدى تۋ ەتە الساق قانا بارشا ارمان- ماقساتىمىزعا قول جەتكىزە الامىز»، - دەدى ح. سافين.
فورۋمدا سونداي-اق شەشەن ۇلتىنىڭ وكىلى بولسا دا، قازاق تىلىندە تۋىندىلار جازىپ جۇرگەن قالامگەر، ءبورلى اۋدانىنىڭ قۇرمەتتى ازاماتى ءارى اقساقالدار كەڭەسىنىڭ ءتوراعاسى مۇحتار بوكايەۆ، كورەي جانە ءازىربايجان ەتنومادەني بىرلەستىكتەرىنىڭ وكىلدەرى گريگوريي تە، اليبالا ميرزويەۆ سىندى ارداگەرلەر ءوز ويلارىمەن ءبولىسىپ، جاستارعا اقىل- كەڭەستەرىن اياپ قالعان جوق. ساۋالدارىنا دا ورنىقتى جاۋاپ بەردى.
اۆتور: ەلجان ەرالى
