قاشاعان كەن ورنى مۇناي باعاسى قانشادان ساتىلسا دا، مەملەكەتكە پايدا اكەلەدى

الماتى. قازاقپارات - «قاشاعان» كەن ورنى مۇناي قانداي باعادان ساتىلسا دا، مەملەكەت ءۇشىن كىرىستى جوبا. بۇل تۋرالى ق ر ەنەرگەتيكا ۆيتسە- ءمينيسترى ماعزۇم مىرزاعاليەۆ باسپا ءسوز ءماسليحاتىندا ايتتى.

 «بۇگىندە قاشاعاندا ىسكە قوسۋ، رەتكە كەلتىرۋ جۇمىستارى جۇرگىزىلىپ جاتىر. قازان ايىنىڭ ءۇشىنشى ون كۇندىگىندە ءبىز كوممەرتسيالىق وندىرىسكە جەتەمىز بە دەپ وتىر. ول شامامەن تاۋلىگىنە 75 مىڭ باررەل. بولاشاقتا بۇل كورسەتكىشتى كوتەرەتىن بولامىز. مەملەكەت ءۇشىن بۇل جوبا كەز كەلگەن جاعدايدا دا كىرىس رەنتابەلدى. سەبەبى، رويالتي (يەلىك - اۆتور) سالىق الامىز، سوندىقتان مۇناي قانداي باعادا بولسا دا بۇل جوبا بىزگە ءتيىمدى»، - دەدى ماعزۇم مىرزاعاليەۆ.

سونىمەن قاتار، ول قۇبىرلارعا قاتىستى شىعىن ماسەلەسىنە دە توقتالىپ ءوتتى.

«ول شىعىندى مەردىگەرلەر وتەدى»، - دەدى ول.

 قاشاعان - كاسپي تەڭىزىنىڭ قازاقستاندىق بولىگىندە ورنالاسقان الەمدەگى ءىرى مۇناي جانە گاز كەن ورنى. ول اتىراۋ قالاسىنان وڭتۇستىك- باتىسقا قاراي 80 ك م جەردە ورنالاسقان. قاشاعان سوڭعى 40 جىلدا تابىلعان الەمدەگى ەڭ ءىرى كەن ورنى بولدى. كەن ورنىنىڭ كوللەكتورى كاسپي تەڭىزىنىڭ سولتۇستىك بولىگىندە تەڭىز تۇبىنەن 4200 مەتردەي تەرەڭدىكتە جاتىر.

 سوڭعى زەرتتەۋ دەرەكتەرىنە سايكەس، كەن ورىننىڭ مۇناي قورى 913 ميلليارد باررەل مۇنايدى قۇرايدى.

اۆتور: الماس مۇقاش ۇلى