قازاقستاندا تەمەكى مەن اراق قىمباتتايدى
بۇل تۋرالى بۇگىن ۇكىمەت وتىرىسىندا ق ر ۇلتتىق ەكونوميكا ءمينيسترى قۋاندىق بيشىمبايەۆ ءمالىم ەتتى.
«الكوگول جانە تەمەكى ونىمدەرىنە اكسيزدەردىڭ فيسكالدىق فۋنكتسياسىن كۇشەيتۋ ءۇشىن ونىڭ مولشەرلەمەسىن ساتىلاپ ۇلعايتۋ كەرەك. قازىرگى قولدانىستاعى سالىق كودەكسىندە اكسيزدىك سالىق مولشەرلەمەلەرىنىڭ ولشەمى 2014-2016 -جىلدارعا عانا بەلگىلەنگەن، ال 2017-2019 -جىلدارعا بەلگىلەنبەگەن. الكوگولدىك ءونىمنىڭ 1 ليترى ءۇشىن:
2017 -جىلى - 2000 تەڭگە، 2019 -جىلى - 2550 تەڭگەگە دەيىنگى اكسيزدىك مولشەرلەمەنى بەلگىلەۋ ۇسىنىلىپ وتىر. 2016 -جىلمەن سالىستىرعاندا، ءوسىم - 85 پايىزدى قۇرايدى. ال سىرا جانە سىرا سۋسىندارىنىڭ 1 ليترى ءۇشىن 2017 - جىلى 39 تەڭگە، 2019 -جىلى 57 تەڭگەگە دەيىن ءوسىرۋ ۇسىنىلادى. 2016 -جىلمەن سالىستىرعاندا ءوسىم 219 پايىزدى قۇرايدى»، - دەدى ق. بيشىمبايەۆ.
تەمەكى ونىمدەرىنىڭ 1000 داناسى ءۇشىن اكسيز 2017 -جىلى 6200 تەڭگە بولسا، 2019 -جىلى 8700 تەڭگەگە دەيىن وسەتىن بولادى.
«سونىمەن قاتار الكوگول ونىمدەرىن ەكسپورتتاۋ كەزىندە قوسارلانعان سالىق سالۋدى بولدىرماۋ جانە وتاندىق وندىرۋشىلەردىڭ باسەكەگە قابىلەتتىلىگىن ارتتىرۋ ءۇشىن ەتيل ءسپيرتى اكتسيزىنىڭ نولدىك مولشەرلەمەسىن بەلگىلەۋ ۇسىنىلادى»، - دەدى مينيستر.
اۆتور: جاسۇلان جولدىبايەۆ
