ارالدا تۇراتىن ەمشى بالاعا جۇرت ىزدەۋ سالىپ جاتىر
بولاشاقتا دارىگەر بولعىسى كەلەتىن ەربولسىن اقتوبەنىڭ ءبىلىم وردالارىنان جان- جاقتى ءدارىس الماقشى ەكەن. ەمىن دە قاتار جۇرگىزىپ ءجۇر. تۇسكە دەيىن مەكتەپكە بارسا، تۇستەن كەيىن ەمدەلۋشىلەردى قابىلدايدى.
بۇل تۋرالى 31 ارنا حابارلايدى.
بۇكىل ەلگە ۇكىلى بالا دەپ تانىلعان ەمشى ەربولسىن سەرىكبايەۆ ارالقۇمدى اقتوبەگە اۋىستىرىپتى. بالانىڭ ەلدەن كەتۋىنە اۋىلداعى ءبىلىم ساپاسىنىڭ تومەندىگى سەبەپ بولعان. بولاشاقتا تەراپيەۆت بولعىسى كەلەتىن ەربولسىن اقتوبەنىڭ ءبىلىم وردالارىنان جان- جاقتى دارىستەر العىسى كەلەدى ەكەن. بيىل 8-سىنىپتا وقيدى.
«ءبىر جاعىنان ءبىلىمىمدى جەتىلدىرۋ ءۇشىن، ءبىر جاعىنان ءوزىمنىڭ ماماندىعىمنىڭ يەسى بولۋ ءۇشىن كەلدىم. ءبىرىنشى بولىپ بىزگە بيولوگيا، الگەبرا، گەومەتريا سىندى پاندەردى جەتىك مەڭگەرۋ كەرەك»، - دەيدى ەمشى ەربولسىن سەرىكبايەۆ.
«ەڭ ءبىرىنشى ءسىز ماعان مەكتەپ وقۋشىسىز، ماعان ءسىزدىڭ ساباققا قاتىسقانىڭىز، ساباق ۇلگەرىمىنىڭ جاقسى بولعانى عانا كەرەك دەدىم. ازىرشە ساباققا مۇلدەم قاتىسپاعان كۇندەرى بولعان جوق. ارينە، دەنساۋلىعىنا بايلانىستى قالىپ قويعان ساتتەرى بار»، - دەيدى سىنىپ جەتەكشىسى كلارا ءدۇيىسوۆا. ەربولسىن تۇسكە دەيىن مەكتەپكە بارسا، تۇستەن كەيىن ەمىن جۇرگىزەدى. ەمشى بالانى اۋىلىنان تاپپاعان ەل اقتوبەگە ىزدەپ كەلىپ جاتىر. 9 جىلدان بەرى توسەككە تاڭىلعان ءۇرزادا اپاي دا ەربولسىننىڭ ەمى ءۇشىن تۇلكىباستان كەلىپتى.
«تاپپاي ءجۇرمىن عوي بۇل بالانى. ارالقۇمدا دا بولدىم. مەن جۇرە المايتىنمىن (جىلايدى) ، 9 جىل بولدى جاتىپ تا قالعانمىن. ەندى قۇداي قالاسا وسى تاياعىمدى تاستاپ جازىلىپ كەتسەم»، - دەيدى ەمدەلۋشى ءۇرزادا قالتايەۆا. ال ەربولسىن سەرىكبايەۆتىڭ اناسى بولسا، اقتوبەگە بالاسىنىڭ قالاۋىمەن كوشىپ كەلگەنىن ايتادى. بالانىڭ بويىندا ەمشىلىكتەن باسقا دا ونەرلەرى بار ەكەن. سوندىقتان دا قالادا ەربولسىننىڭ جان- جاقتى دامۋىنا مۇمكىنشىلىكتەر كوپ دەيدى اناسى.
