جاۋاپسىز اليمەنتشىلەردەن شارشاعان بيلىك اكە بولۋعا ۇيرەتۋدى ءوز قولىنا الماق

استانا. قازاقپارات - باس پروكۋراتۋرا قازاقستاندا جاۋاپتى اكە ينستيتۋتىن قۇرۋدى ۇسىنادى.

بۇل ۇسىنىستى ۇيلەستىرۋ كەڭەسىنىڭ بۇگىنگى وتكەن وتىرىسىندا باس پروكۋروردىڭ ءبىرىنشى ورىنباسارى يوگان مەركەل جاريا ەتتى.

«انا مەن بالا پروبلەمالارى تۋرالى ايتا وتىرىپ، ءبىز اكە پروبلەمالارىن ۇمىت قالدىردىق. وتباسىن جوسپارلاۋعا، اكە بولۋعا جاۋاپسىز قاراۋدىڭ ءوزى اليمەنت تولەمەۋدىڭ باستى سەبەپتەرىنىڭ ءبىرى ەمەس پە. اليمەنتتى تولەمەيتىندەردىڭ %97 - بۇل ەر ادامدار»، - دەيدى ول.

ي. مەركەلدىڭ ويىنشا، قازىرگى ۋاقىتتا ەر بالاعا ءتيىستى مورالدىق تاربيە بەرۋ ءىسى جولعا قويىلماعان. بۇل ولقىلىقتىڭ ورنىن تولتىرۋ ءۇشىن جۇيەلى تۇردە شارالار اتقارىلۋ قاجەت، دەپ ەسەپتەيدى.

«جاس ءوسپىرىمدى اكە بولۋعا ەشكىم ۇيرەتپەيدى، دايىندامايدى. بار دايىندىق - بۇل ءبىزدىڭ اكەلەرىمىزدىڭ ۇلگىسى نەمەسە ەڭ كوپ دەگەندە، ولاردىڭ كەڭەستەرى. ال ەگەر اكەسى جوق بولسا نەمەسە ول ماسكۇنەم، ناشاقور بولسا شە؟ ءبىز بۇگىنگى كۇنگە دەيىن بۇل پروبلەمانى وتباسى دەڭگەيىندە قالدىرىپ كەلدىك. ونىڭ اۋقىمىن ەسكەرە وتىرىپ، اكە بولۋ پروبلەمالارىن مەملەكەت ساياساتىنىڭ دەڭگەيىنە شىعارۋ قاجەتتىلىگى تۋىندادى»، - دەپ اتاپ ءوتتى سپيكەر.

ايتا كەتەيىك، بۇنىڭ الدىندا حابارلاعانىمىزداي، قازاقستاندا اليمەنتتەر بويىنشا قارىز 2 ميلليارد تەڭگەگە جۋىقتاعان. بۇگىندە ەلىمىزدە 350 مىڭنان استام بالا اليمەنتكە مۇقتاج.