ۇستازى مەيرامبەكتىڭ جاستاي «قايىن اتا» اتانۋىنىڭ سەبەبىن ءتۇسىندىردى

استانا. قازاقپارات - مەيرامبەك بەسپايەۆتىڭ ۇستازى التىنبەك قورازبايەۆ كوپشىلىكتىڭ كوڭىلىن كۇپتى ەتكەن ساۋالعا جاۋاپ بەردى.

 ول مەيرامبەك بەسپايەۆتىڭ ۋاقىتىنان ەرتە «قايىن اتا» ، ال ونىڭ جۇبايى مارحابباتتىڭ «قايىن ەنە» اتانۋىنىڭ سەبەبىن ءتۇسىندىردى.

«وكىنىشكە قاراي، مەيىربەكتىڭ اكەسى دە، شەشەسى دە و دۇنيەلىك بولىپ كەتكەن. مەيرامبەك «قاناتتىعا قاقتىرماي، تۇمسىقتىعا شوقتىرماي» ءوزىنىڭ نەمەرە ءىنىسىن بالاسىنداي كورىپ، ۇلكەن توي جاسادى» ، - دەدى التىنبەك قورازبايەۆ كتك ارناسىنىڭ «ينستالايىق» باعدارلاماسىنا بەرگەن سۇحباتىندا.

سونىمەن، مەيىربەك بەسپايەۆ - مەيرامبەك بەسپايەۆتىڭ اعاسىنىڭ بالاسى بولىپ شىقتى. جاستاي اتا- اناسىنان ايىرىلعان نەمەرە ءىنىسىن مەيرامبەك باۋىرىنا باسىپ، اكە ورنىنا اكە بولسا، ونىڭ جۇبايى مارحاببات اناسىنداي قامقورلىق تانىتقان.

ەستەرىڭىزدە بولسا، جۋىردا ءانشى مەيرامبەك بەسپايەۆ كەلىن ءتۇسىرىپ، دۇركىرەتىپ توي جاسادى. العاشقىدا قىزىلوردا وبلىسىنىڭ شيەلى اۋدانىنا بارىپ، رابيعا ەسىمدى بويجەتكەنگە قۇدا تۇسكەن بەسپايەۆتار اۋلەتى ارتىنشا كەلىن ءتۇسىرىپ، بەتاشار ءراسىمىن وتكىزدى. قىسقاسى، قازاقتىڭ سالت- داستۇرلەرىن رەت- رەتىمەن ورىندادى. وتاۋ قۇرعان جاستار مەيىربەك پەن رابيعانىڭ تويى ەل اراسىندا قىزۋ تالقىعا سالىندى. وعان ءبىر سەبەپ - بەتاشار راسىمىندە اسابا مەيرامبەكتى ەل الدىندا «قايىن اتا» ، ال ونىڭ جۇبايى مارحابباتتى «قايىن ەنە» دەپ تانىستىرۋى. جۇرت بەسپايەۆتاردىڭ بۇل قىلىعىن تۇسىنبەدى. «مەيرامبەكتىڭ اكە- شەشەسى بولا تۇرا مۇنىسى نەسى» دەپ سوكتى كوپشىلىك.

Stan.kz