استانا پوليسەيلەرى تويداعىلاردى توناپ كەتكەن «قوناقتى» ىزدەستىرىپ جاتىر

استانا. قازاقپارات - استانا قالاسىنىڭ ىشكى ىستەر دەپارتامەنتى بوتەن ادامداردىڭ تويىنا كەلىپ، قۇددى ءوز تويىندا جۇرگەندەي بي بيلەپ، سوڭىندا ەكى ادامنىڭ ۇيالى تەلەفونىن ۇرلاپ كەتكەن جىگىتتى ىزدەۋگە كىرىستى.

بۇل تۋرالى قازاقپارات تىلشىسىنە استانا قالالىق ىشكى ىستەر دەپارتامەنتى باسپا ءسوز قىزمەتىنىڭ جەتەكشىسى سوفيا قىلىشبەكوۆا حابارلادى.

استاناداعى ۇرلىقتىڭ جاڭا ءتۇرى تۋرالى ينستاگرامم الەۋمەتتىك جەلىسىندەگى «v_astane»  اتتى پابليك حابارلاپ وتىر.

«استانا تۇرعىندارىنىڭ نازارىنا. 01.10.2016 كۇنى بوتەن ادامنىڭ تويىنا كەلىپ، ءوز تويىندا جۇرگەندەي قىدىرعان مىنا جىگىتكە ىزدەۋ سالامىز. توي يەلەرىنىڭ ءبارى ونى بىرەۋدىڭ تۋىسى شىعار دەپ ويلادى. كەش بويى كوڭىل كوتەرىپ، جاس جۇبايلار ءۇشىن قاتتى قۋانىپ ءجۇردى. تويدىڭ سوڭىندا 2 ادامنان «بىرەۋگە قوڭىراۋ شالىپ الايىنشى» دەپ ۇيالى تەلەفوندارىن العان دا، تايىپ تۇرعان. تويعا كەلگەن ادامنىڭ قاراسى كوپ بولدى، باسقا زارداپ شەككەن ادامدار دا بار شىعار. تويدان قالعانى ونىڭ «كوڭىلدى» سۋرەتتەرى عانا. بۇل جىگىتتى ءوز تويىڭىزدا كورسەڭىز، حابارلاسۋىڭىزدى سۇرايمىز. ارينە، ول ۇيالى تەلەفونىڭىزدى الىپ كەتپەسە...» ، - دەپ جازعان پوست يەسى.

 ال، استانا قالاسىنىڭ ىشكى ىستەر دەپارتامەنتىنە ازىرگە ەشكىم ۇرلىق تۋرالى ارىز تۇسىرمەگەن ەكەن. «ءبىراق، الەۋمەتتىك جەلىلەردەن كورىپ، ارىز تۇسپەسە دە، ۇرلىق فاكتىسى بويىنشا تەرگەۋ باستالدى. بۇل جىگىتتىڭ اتى- ءجونىن، قاي تويدا ۇرلىق جاساعانىن، باسقا دا قىلمىستىق ىستەرگە قاتىسى بار ما، جوق پا، انىقتاۋعا كىرىستىك»، - دەدى س. قىلىشبەكوۆا.

اۆتور: كەنجەكەي توقتامۇرات قىزى