موڭعوليادان كوشىپ كەلگەن قانداسىمىزدىڭ جيھاز سەحىنان شىققان ونىمدەرگە سۇرانىس جوعارى
استانا قالاسىنىڭ ىرگەسىندەگى سەلينوگراد اۋدانىنىڭ قاراتال اۋىلىنا قونىس تەپكەن ول، وزىمەن بىرگە ەرىپ كەلگەن وتباسىن اسىراۋ ءۇشىن ەش جۇمىستان باس تارتپاي، كۇزەتشى دە، قاراپايىم جۇمىسكەر دە بولىپ ەڭبەك ەتتى. وتانىنا ورالماي تۇرىپ اعاشپەن جۇمىس جاساۋدىڭ تەتىگىن مەڭگەرگەننەن كەيىن ءوز ءىسىن اشۋعا بەل بۋادى.
الايدا، قولىندا قاراجاتىڭ بولماسا، ءوز ءىسىڭدى باستاپ كەتۋ وڭاي ەمەس. وسىنى تۇسىنگەن ەرجان اۋىلدىق اكىمدىككە بارىپ، ماقساتتى توپتىڭ تىزىمىنە ورالماندار دا كىرەتىن «جۇمىسپەن قامتۋدىڭ جول كارتاسى - 2020» باعدارلاماسىنا قاتىسۋعا نيەت بىلدىرەدى. ونداعىلار ونىڭ بەتىنەن قاقپاي، كەرىسىنشە كومەك- قولداۋىن ءبىلدىرىپ، اقىل- كەڭەس بەرەدى. وسىلايشا، «اۋىل شارۋاشىلىعىن قارجىلاي قولداۋ قورى» ا ق ماماندارىنان تولىق اقپاراتتى الىپ، قۇجاتتارىن دايىنداۋعا كىرىسەدى. كەيىن اۋداندىق جۇمىسپەن قامتۋ ورتالىعىنا تىركەلىپ، كوپ ۇزاماي 3 ميلليون تەڭگە كولەمىندە شاعىن نەسيە الىپ، ءوز ارمانىن جۇزەگە اسىرۋعا كىرىسەدى.
«بۇل قاراجاتقا شاعىن جيھاز سەحىنە قاجەتتى قۇرال- جابدىق پەن دايىن جيھازعا قاجەتتىنىڭ ءبارىن ساتىپ الدىم»، - دەي كەلە، كاسىپكەر ءبىر ادامدى، ياعني، جيھاز شەبەرىن تۇراقتى جۇمىسپەن قامتىپ وتىرعانىن دا اتاپ ءوتتى. ال، دايىن ءونىمدى ءوزىنىڭ ايەلى ساتۋدا.
سەح ءۇيىنىڭ اۋلاسىندا ورنالاسقاندىقتان جيھاز دۇكەنى دە وسى جەردەن تابىلادى. بۇل كۇنى كاسىپكەر تاپسىرىسپەن اۋىل ومىرىنە ارنالعان باعاسى قولجەتىمدى اس ءۇي جانە جاتىن بولمە جيھازدارىن جاساۋدا. تۇتىنۋشىلاردىڭ اراسىندا استانادان ارنايى ات تەرلەتىپ كەلەتىندەر دە بار كورىنەدى.
«ءبىز جيھازدى جاساۋمەن دە، جيناۋمەن دە اينالىسامىز ءارى كەرەك بولسا، جەتكىزىپ تە بەرەمىز. باعاسى قولجەتىمدى. سوندىقتان، تابىسىمىز كۇن كورىسكە دە، نەسيەمىزدى وتەۋگە دە جەتەدى جالپى، «جۇمىسپەن قامتۋدىڭ جول كارتاسى - 2020» باعدارلاماسىنىڭ بەرەرى مول دەپ ەسەپتەيمىن»، - دەيدى كاسىپكەر.
اۆتور: اسلان وسپانوۆ
