ورالدا سوت قىزمەتكەرلەرى مەملەكەتتىك تىلدەن سايىسقا ءتۇستى
سونىڭ ءبىرى رەتىندە كەڭسە ماماندارىنىڭ مەملەكەتتىك ءتىلدى بىلۋىنە ارنالعان بايقاۋ ۇيىمداستىرىلدى.
ب ق و سوتىنىڭ باسپا ءسوز قىزمەتىنەن تۇسكەن مالىمەتكە قاراعاندا، اتالمىش سوت ءتوراعاسى مۇرات يمانبايەۆ، قالالىق سوتتىڭ سۋديالارى، سوتتىڭ كەڭسە مەڭگەرۋشىسى، باتىس قازاقستان وبلىستىق سوتىنىڭ مەملەكەتتىك ءتىلدى دامىتۋ ماسەلەلەرى بويىنشا باس مامانى، قازاقستان جازۋشىلار وداعىنىڭ مۇشەسى امانكەلدى شاحين قازىلىق ەتىپ، سۋديالار مەن سوت قىزمەتكەرلەرى قۇلشىنا تاماشالاعان مەملەكەتتىك ءتىل سايىسى مازمۇندى ءوتتى.
سايىس ءۇش تۋر، بەس تاپسىرمادان تۇردى. ەكى كەزەڭنەن تۇراتىن العاشقى تۋردىڭ ءبىرىنشى كەزەڭىندە كونكۋرسقا قاتىسۋشى ءوزىن تانىستىرسا، ەكىنشى كەزەڭدە سوت بيلىگىنە قاتىستى ماقال- ماتەلدەر ايتىپ، مازمۇنىن ءتۇسىندىردى نەمەسە اڭىزعا اينالعان ءبي شەشىمدەرىن مانەرلەپ ايتىپ بەردى. ەكى تاپسىرمادان تۇراتىن ەكىنشى تۋردا جارىسقا قاتىسۋشىلار قازاق ءتىلىنىڭ گرامماتيكاسىن قانشالىقتى مەڭگەرگەندەرىن كورسەتىپ، سوت تورەلىگىنە قاتىستى ءسوزدى سەپتەدى. ال ءۇشىنشى تۋردا كوميسسيا مۇشەلەرى كەزەكتەسە ۇسىنعان زاڭ تەرميندەرىن ورىسشادان قازاقشاعا اۋداردى.
سوت قىزمەتكەرلەرىنىڭ كوپشىلىگى ەركىن ءسوز ساپتاپ، سويلەمدەردى جەتىك تالدادى. ءتىپتى ارالارىندا اقىندىق قابىلەتى بارلارى دا بايقالدى.
قىزعىلىقتى، تارتىستى وتكەن باسەكەدە جەتەكشى مامان گۇلنۇر ادىلبەكوۆا توپ جارسا، ەكىنشى ورىندى باس مامان دينارا بەكقوجينا يەلەندى. جەتەكشى مامان گۇلدانا بولاتوۆا ءۇشىنشى ورىنعا شىقتى. جەڭىمپاز- جۇلدەگەرلەرگە ديپلومدار مەن سىيلىقتار تابىس ەتىلدى. جارىسقا قاتىسۋشىلاردىڭ قاي- قايسىسى دا دا ماراپاتتان شەت قالمادى. ءمولدىر بەكقاليەۆا، الەكساندار حابيبۋلين، ءمادينا قۇلمانوۆا، التىن رايدوللينا، ءالىمباي يسليامعاليەۆتەرگە قالالىق سوت ءتوراعاسىنىڭ العىسحاتتارى تابىس ەتىلدى.
شارا بارىسىندا سايىسقا قاتىسۋشىلار ءوز ونەرلەرىن كورسەتىپ، جانكۇيەرلەردى رۋحاني سۋسىنداتتى.
«مەملەكەتتىك ءتىلدىڭ اياسىن كەڭەيتۋ - وتە ماڭىزدى ماسەلە. مۇنى ءبىز كۇنبە-كۇن نازاردا ۇستاپ، قىزمەتكەرلەرىمىزدىڭ قازاق ءتىلىن مەڭگەرىپ، ساۋاتتى قولدانۋىنا بارىنشا كۇش سالۋدامىز»، دەدى م. يمانبايەۆ.
اۆتور: ەلجان ەرالى
