باس پروكۋرور: تەكسەرۋشى كوميسسيانى قوناق قىلعان دا، قوناق بولعان دا جازالانادى
وڭىرگە كەلگەن مامانداردىڭ نەگىزگى ماقساتى - ەل ىشىندەگى جاعدايمەن تانىسىپ، جەرگىلىكتى پروبلەمالاردى شەشۋگە كومەكتەسۋ. بۇل تۋرالى اقتوبە جۇرتشىلىعىمەن كەزدەسۋدە جاقىپ اسانوۆ مالىمدەدى، دەپ جازادى kerek-info.kz.
اقتوبە وڭىرىندە ءبىر اي ۋاقىت جۇمىس جاسايتىن استانالىق توپ ەلباسىنىڭ تىكەلەي تاپسىرماسىمەن كەلگەنىن ايتتى.
- ەكى جۇزدەن اسا مامان كەلدىك. وسىندا سىزدەرمەن بىرگە جۇمىس جاسايمىز. ماقساتىمىز بىرەۋلەردى تەكسەرۋ، كەمشىلىك ىزدەۋ، باعا بەرۋ ەمەس. جەرگىلىكتى پروبلەمالاردى بىرلەسە جۇمىلىپ شەشۋ. جالپى جۇمىسىمىز 7 باعىت بويىنشا جۇرگىزىلمەك. حالىق اراسىندا ءتۇسىندىرۋ جۇمىستارىن جۇرگىزۋ، شاعىن كاسىپكەرلىكتى دامىتۋ، الەۋمەتتىك پروبلەمالاردى شەشۋ، ءدىني احۋالدى جاقسارتۋ، اقپاراتتاندىرۋ جۇمىسى، قۇقىق قورعاۋ قىزمەتىنىڭ تيىمدىلىگىن ارتتىرۋ بولىپ تابىلادى. جەتى باعىت بويىنشا جەتى سالاعا قاتىستى ۆيتسە- مينيسترلەر باسقارىپ كەلدى. بار ماسەلەنى شەشەمىز دەپ ايتۋ قيىن، ول مۇمكىن دە ەمەس.
ءبىراق ناقتى جوسپارلارىمىز بەن ماقساتتارىمىز بار. كەيىن وسى تاجىريبەنى باسقا وڭىرلەردە دە قولدانساق دەگەن وي بار. ءبىز كەتكەن سوڭ دا جۇمىس اياقسىز قالمايدى دەگەن ۇمىتتەمىز. ءبىزدى قوناق دەپ، كۇن سايىن قىدىرتۋدى ويلاماي-اق قويىڭىزدار. قوناق ەتكەن ادام دا، قوناق بولعان ادام دا جازالانادى. ءبىز مۇندا جۇمىس جاساۋ ءۇشىن كەلدىك، - دەگەن باس پروكۋرور حالىق پەن شەنەۋنىكتەردىڭ ءبىر- ءبىرىن تۇسىنبەيتىنىن العا تارتتى.
«حالىقتى وياتا الماي وتىرمىز»
اقتوبەگە ءبىر اي جۇمىس ساپارىمەن كەلگەن باس پروكۋرور ءاربىر قازاقستاندىق ءۇشىن كۇرەسۋ كەرەكتىگىن العا تارتتى. قازاقستاننىڭ ءار تۇرعىنى ءۇشىن مەملەكەت تاراپىنان جاسالىپ جاتقان باعدارلامالاردىڭ ءتيىمدى پايدالانىلماي جاتقانىن مالىمدەدى.
- مەملەكەت كوپ مۇمكىندىك بەرىپ جاتىر. ميللياردتاعان اقشا، قىرۋار زاڭدار، باعدارلامالار بار. ءبىراق وسىنى قالاي پايدالانۋ كەرەكتىگىن حالىق بىلمەيدى. نەگە؟ ويتكەنى، حالىق شەنەۋنىكتى، شەنەۋنىك حالىقتى تۇسىنبەيدى. سىرەسىپ قالعان رەسمي تىلمەن ەمەس، حالىققا كادىمگى قاراپايىم تىلمەن ءتۇسىندىرۋ كەرەك. شەنەۋنىكتەردىڭ «ءوز» ءتىلى بار ەكەنىن مويىندايمىز. ءبىراق، ول ءتىلدى قاراپايىم حالىق قايدان ءتۇسىنسىن؟ ادامدارعا اقپاراتتى تۇسىنىكتى تىلمەن، قاراپايىم تۇردە جەتكىزە ءبىلۋ كەرەك، - دەدى باس پروكۋرور جاقىپ اسانوۆ.
